Russia nung Magnitogorsk ki chirepdak asür 37 jungogo

Moscow, Aenjeti/Jan. 03 (Agencies): Russia nung nisung aliba ki apartment ka nung gas apokba lendong nung asürtem ya Yangtepnü/Thursday tashinung 37 jungogo, kong ketdangsertemi ki chireper alidak nungi tasümang timba atsütet. Asürtem rongnung tanur trok dena lir aser nisung pezü tasü taküm mejangjateter, ta emergency situation ministry ajanga sangdong ka nung ashi.
Ural tenemtsüng nung aliba Magnitogorsk yimti nung iba lendong ataloka alidak ketdangsertemi asükasa arema nüburtem kümzüktsü meranger, kong temperature ya minus 27 degree Celsius tashi temokong lir. Iba tesem nungi tanur ana densema nisung trok kümzüka lir saka Sangtennü nungi tenzüka taküm alir kata nguteta mali, kong ita ter kinü tanur ka taküm nguteta liasü.
Tentonü anepbongi Moscow nungo kilometer 1,700 shi bilar aliba yimti nung iba gas apokba ajanga story ter atongtepa yanglua aliba poksa. Soviet nunger mapang yangluba iba kidang nisung 1,100 shi liasü aser iba gas apokba ajanga ki takdang 35 aoyi aküm.
Yangtepnüa iba tesem nung nüburtem kümzüktsü asoshi maneni mapa inyaker, kong ketdangser 900 shi mazüngi jana-ona merüktetba mapang lir, ta emergencies ministry ajanga ashi. Takdang temalen tongtettsü mechi abu ka yanglua lir aser anasa aliba jara ka tashi mait aliba ajiteta raksatsüogo, ta ketdangsertemisa ashi.
Iba ki nung alir karbo Yangtepnü parnok indang oset agizüktsü asoshi ki telungi yok, ta ministry ajanga ashi. Lendong nungi kümzüka alirtem ajak anepaludagi, ta Chelyabinsk regional governor Boris Dubrocsky-i Yangtepnü mozüki kar semdangba sülen osang ka sangdong.
Dubrovsky indang office ajangasa ashiba agi, pai iba lendong ajurur alir nem senotsü teyari agütsütsü mulungogo aser iba teyari kübok sür aliba kinungertem nem sen $14,500 aser yirur alir nem Russia nunger sen ruble 400,000 ($5800 shi) agütsütsü. Ki samar aliba kibongtem nem Russia nunger sen ruble 500,000 den ki tasen kaka agütsütsü.
Maneni senotsü teyari ya asübila sentong atema agütsütsü, ta governor indang office ajangasa ashi. Iba lendong atalokba mapang nisung timba mejanger liasü.