Russia nunger Boxer Dadashev tekelok yiruba sülen asü

Moscow, Chiteni/July 24 (Agencies): Russia nunger boxer Maxim Dadashev Maryland nung tsüngtepba mapang tekelok yiruba sülen süogo, ta Russian boxing federation-i metetdaktsü.
“Subriel Matias den tsüngtepba mapang yiruba sülen Maxim Dadashev United States nung süogo,” ta federation-i sangdong ka ajanga metetdaktsü.
Arishi küm 28 tain asayar ya Hokolbarnü Puerto Rico nunger asayar Matias den super-lightweight bout ka asayaba sülen Washington nung aritepa tekelok surgery agi. Iba asaya ya round 11buba nung pa cornerman James “Buddy” McGirt-i anendakja liasü.
Dadashev shiba dang “Mad Max” ta ajar pa asaya tembangba sülen dressing room tonga jajaa motet aser aritepa mozükidangi anri ao. Doctor temi pa tekolok waka aliba sünemdaktsütsü asoshi operation agia liasü.
McGirt-i ashiba agi, pai pa asaya nungi mesongtemteti liasü saka asayaa aoba mapang pa tazük achiba ngua ring nung towel mereplokja asaya anendaktsütsüsa aküm.
“Iba tatalokba ajanga onok asayaba asaya tali jangjadaktsür,” ta McGirt-i ESPN dang ashi.
“Training mapang pai tashiba ajak inyakogo aser kecha timtem mali asü. Kü mulung kanga mesüngjemteter. Ni kechi balaka inyakteter lila ta bilemdanger saka tatem nungbo training mapang ajak shidak dang liasü.
“Pa renemer liasü aser ajak shidak dang liasü saka onok asayaba asaya agi iba ya dang lir. Khen dang tsüngshi nung tatem,” ta paisa ashi.
Russian boxing chief Umar Kremlev-i Russian media dang ashiba agi, Dadashev tasümang kidangi bener arutsü aser par kinungertem nem senotsü teyari agütsütsü.
Dadashev kinungtsü Elizaveta Apushkina-ia kinungbo asüba osang jangjatsüogo.
“Pa kanga dang temeim aketba nisung ka liasü shibai tatem tashi raraogo. Ozü jabaso0 ya tebu ama nisung tajung ka küma anitettsü,” ta lai kinungbo indang ashi.
Dadashev-i, 140-pound non-title fight nung 13 ben asayaba khen danga tamakok ngua mali.
Top Rank mendenbuba Bob Arum-i Dadashev ya asangur tajung ka liasü ta ashi. KAsa mapang nung ESPN+ puri Dadashev’er kibong, medemer, trainer aser Top Rank nung team den asükhu lemsatepogo.
Hokolbarnü asaya Matias-i amokbanger asaya aser round 11buba sülen McGirt-i Dadashev dang ni asaya anendaktsütsü ta ashiba angashiogo. Iba sülen McGirt-i referee dang ojang dang asayadaktsütsü shia liasü.