Russia nunger helicopter ka Siberia nung tsükok, nisung 18 asü

Luroi/August 04, 2018 (Agencies): Küptoknü Siberia kübok Krasnoyarsk tesem nungi Russia nunger indang commercial helicopter ka apusoa aruba mapang tsükoka iba tayimtsü nung aliba nisung ajunga (18) asü.
Utair airlines meyong helicopter nungya passenger 15 den tayimtsü ketdangsür asem mena liasü aser parnok ajak asüba osang angjaogo, ta Russia nunger indang news agency, TASS dang emergency service osang ka ajanga ashi.
Mi-8 helecopter ya totzü atsüba tesem kati mapa inyaker anir apusoba mapang helicopter kati bena aliba machine den tsüktep, ta transport ministry ajanga ashi.
Machine bena aliba tayimtsü yabo timtem melie anen aser iba lendong ya tsüngsang tajung nung atalok, ta mezüng bushitetba osang nung shia lir.
“Ali nungi apusoba mapang, passenger bena aliba Mi-8 yagi tanga helicopter kati khu bena aliba nung oa atsük aser iba kuli ya mejangjateti lir. Iba sülen Mi-8 ya ali nung tsüka ana küma sangdang aser mi adoka arong,” ta tayimtsütem mita repranger, Rosaviatsia-i ashi.
Iba lendong atalokba indang kuli bushisüngdang tenzükogo.
Iba helicopter indang black box tem ngutetogo aser tereprangtsü nungbo meraksa amai lir, aser bushisüngdangtsü atema Moscow-i yoktsü, ta TASS ajanga ashi.