Russia nunger Rio-i meyoktsü nokdangba lapoktsüogo:IOC

Lausanne, July 24 (Agencies) : Deobarnü International Olympic Committee (IOC)-i Russia nunger asayartem Rio Olympic-i meyoktsü ta metetdaktsü saka iba tenokdangba lapoktsüogo.
“Asayartemi IOC temulung ajitsüsa International Federation (IF)-i pa mesüra la indang kuli tejangja agütsütetra parnok shilem agidaktsütsü,” ta Executive Board den senden ka amenba sülen IOC-i sangdong ka ajanga metetdaktsü.
“Asayamung nung shilem agidaktsütsü atema Ifs-i asayar shia shibangtsür aliba mozü amshir asü masürar kanga junga tendangtsüla,” ta sangdong nungsa shia lir.
International Association of Athletics Federations’ (IAAF)-i Russia nunger athletic rangben Rio Olympics nung shilem magidaktsütsü metetdakja liasü.
World Anti-Doping Agency (WADA)-i Russia athlete tem international saisapong kecha nunga shilem nmagidaktsütsü ta ashiba sülen IOC-i iba telemtetba agi.
Rio Olympic nung shilem aginer Russia nunger ajak IOC-i mulungba ama kanga junga tendangtsüsa akümtsü.