Russia nungeria British Diplomats 23 meindoker

Reuters, Metsüremi 17 (Agencies) : Southern England nung lia Russia nunger taoba itdangiter (double agent) aser pa jala na anema nerve raksatsüba mim amshia tashiyim maparen inyakba atema British nungeri Kremlin aitsüba agi jashir mang ayangba temaitsü Russia-ia tanü Küptoknü British nunger diplomats par metsür asem meindoktsü atema lemtetogo.
Russian Foreign Ministry-i ashiba agi, British nunger diplomats par metsür asemji linük toktsür aotsü asoshi hopta ka mapang agütsür.
Iba denji külemi linük ana tsüngda tesendaktep raksaba maparen ka nung, British Council pur inyakyim ajak shibanga yutsür, ta Russia-i metetdaktsüogo. Iba council yagi linük ana tsüngda sobalibaren tsütsü tesendaktep atema inyaker.
Ano St. Petersburg nung consulate-general ka ayutsü atema Britain den tezüngzüktepba ka yanglua alibajia agiener, ta Russia nungerisa metetdaktsüogo.
Kasa osang ajanga ashiba agi, Taoba Russia nunger itdangiter arishi küm 66 taqin Sergei Skripal aser par jala Yulia Skripal (Küm33) na anema tashiyim mapa inyakba agi jashir Russia nunger diplomat 23 meindoktsü atema Yangtepnü Britain-i telemtetba agiba sülen tang Russia nungeria meyiper ibaji mang ayanger.
Tanü central Moscow nung Russia Foreign Ministry-i British ambassador, Laurie Bristow senden ka nung jaoka iba telemtetbaji shiogo.
Ano tanga osang ka ajanga ashiba agi, Russia nungeri kechi telemtetba agiogo, iba jagi taoba itdangiter anema inyakba kuliji melenshidaktsütsü makok, ta tanü Küptoknü Prime Minister Theresa May-i metetdaktsüogo.