Russia nungi UN ambassador temulungjang tashidak agi asü

New York, March 11 (Agencies) : Russia nungi United Nations ambassador pa office nung ajungbena laoa temulungjang tashidak agi asü ta jangjaogo. Pa asüba nung tanga tai mesüra temulung melemtetba kecha mali, ta ketdangser tejen kati ashi.
Ambassador Vitaly Churkin kechi komaser asü ibaji ashitsü asoshi iba ketdangser nem temelaba agüja maliasü anungji pai osangbenertem dang pa tenüng meshii iba osang metetdaktsü.
Taoba ita Churkin temang sensaa reprang, ajisüaka pa kechi komaser asü ibaji kanga junga bushidangtsü nüngdaka liasü aser item mapa tembangogo. Saka yimti medical examiner atema otongdar Julie Bolcer-i, yimti Law Department-i international inyakyim nung aliba ama pa asüba osang kecha meprokshitsü ashi, ta metetdaktsü.
Russia UN Mission atema otongdar kati Churkin asüba dak sendakba nung kecha melangzütsü ta ashi.
Nisung ka ozüng alema raratepdang asüba, lendong nung asüba, soseta asüba, aoksa asüba mesüra yimya masüba maparen agi asüba bushisüngdangtsüji medical examiner mapa lir. Yimti inyakyim nung bushisüngdanger ngutetba osang tejangja temai adoka metetdaktsütsü keta lir.
Churkin ya February 20, 2017 nü arishi küm 64 nung asü. Pa 2006 küm nungi Russia nungi UN ambassador inyaka aru. Security Council nung ambassador mapa talangtiba inyaka arusangji Churkin lir.
Pa Moscow nung aremdang Foreign Minister Sergey Lavrov-i pa nem tenüngsa agütsü aser linük Tir Vladimir Putin-i Churkin nem agütsüba medal ka pa lep nung yutsü.