Russia o Ukraine nati tensa tajungba kümdaktsütsü merangtsüla: Kerry

Serbia kübok Belgrade nung ayongba Organization for Security & Cooperation in Europe (OSCE) Ministerial Council senden nung o jembitsü asoshi U.S. Secretary of State, John Kerry (Abelen)-i terenemshiba agiba noksa ka yangi angur. (Belgrade, December 03)

 Belgrade, December 03 (Agencies): Ukraine nung taoba mapang agiba yimjung tezüngzüktep mapa küma benshitsü aser Ukraine tensa tajungba kümdaktsütsü asoshi Russia o Ukraine napronglai nungdakba maparen inyaktsü tajungshiba olen ka US Secretary of State, John Kerry-i tanü Brehostibar nü metetdaktsüogo.

Serbia kübok Belgrade nung ayongba Organization for Security & Cooperation in Europe (OSCE) Annual Ministerial Council senden nung shilem agidang Kerry-i tanü iba olenji metetdaktsü.

Russia-i Ukraine anüdoklen yutsüba mitkar aser tongpang raratsü osettsüset ajunga agienba den külemi, tongpang raradak, Donbas-i OSCE tetendangertem aitsü melaba ajanga Ukraine nung tensa tajungba akümtsü ta Kerry-i ashi.

“Ukraine-ia sorkar anemertem den agiba yimjung tezüngzüktep mapa küma benshitsüla aser par anüdoklen densemba tesemtem tanaben yanglushitsüla,” ta pai shisem.

Ano, OSCE-i küm 40 tsüngda nung terenlok tulu ngua lir saka par tenteti tarutsü mapang nunga tongti mapatong jenti inyaktsü anüngdaka aliba olen ka Kerry-i tanü sangoktsü.

“OSCE züngsemtem rong nung mitkar osangtsüsang tali lemsatepba den külemi, nübur temeten anema inyakba maparen nokdangtsü nungdaka lir,”ta pai ashi.

Paisa ashiba agi, OSCE kübok densemba linük aika nung tentetba Nongovernmental organizations (NGOs) aser osangbenertemi tetsükdakba tulu ajurur anungji kasaji melenshitsü nungdaka lir.

Ano külen, tan OSCE senden nung shilem agir, Russia Foreign Minister, Sergei Lavrov o Turkey Foreign Minister, Mevlut Cavusoglu nati tanü ajurutepa jurila senden ka amenba osang angazükogo.

Linük ana indang Foreign Minister anati tawa Turkey-i Russia’er tayimtsü anüng tom nungi kazüka yokba ajanga adokba mangatettep ken o benoka tanü sendenji amen.

Tanü senden nung shilem agiba jakdang Kerry-i Serbia Ato Kilonser, Aleksandar Vucic den yashi Bodbar nü ajurutepba osanga jangjaogo.