Russia & Pak mitkartemi teloktep terenemshitsü sentong agitsü renemshir

Islamabad, September 23 (Agencies): Pakistan mitkartem den aroki lungjemer teloktep mitkar terenemshitsü sentong agitsü nükjidong nung Russia mitkar telok kati Pakistan tanü, Hokolbar nü tonga ogo.
India kübok Jammu & Kashmir nung densemba Uri nung kiralongrartemi lendong atalokdaktsüba sülen India den lungjema lir ta sayutsü atema Pakistan mitkartem den teloktep mitkar sentong agitsü asoshi renemba sentongji agientsü asoshi Russia-i nangzük saka iba osang metetdaktsür anogo ishika tsüngda nung Russia-i par mitkartem Pakistan tonga tan yoker lir.
“Tan mezüngsüa agitsü ayongba Pak-Russia teloktep mitkar sentong nung shilem agitsü atema Russia mitkar telok ka ozü Pakistan tonga aruogo aser teloktep mitkar sentongji asüng, Honibar nü nungi tenzüka agitsü renema lir,” ta Pakistan mitkar otogndar,  Lt Gen Asim Saleem Bajwa-i osang jangjashitsü.
Hopta 2 shi agitsü ayongba aser ‘Friendship 2016’ ta ajaba mitkar terenemshitsü sentong nung linük anaprongla nungi temeyoktep mitkar züngsem 200 shi shilem agitsü renema lir.
‘Friendship 2016’ mitkar sentong den sentakba osang tejangja memetetdaktsüi lir saka iba sentongji Pakistan kübok tenemlen agitsü renemba osang metetdaktsüogo.
Russia nungi tongpang nung amshitsü mitkar tayimtsü alizüktsü densema, Islambad aser Moscow na tsüngda tesendaktep tajungba akümtsü tenzükba mapang ka nung par mitkartemi tan teloktep terenemshitsü sentongji agitsü renemshir lir.
US den tesendaktep mejungi akümtsüsa tensa ajurudang par linük jenjang junga alitsü nükjidong nung Pakistan linüki Russia den tesendaktep junga ayutsü merangba osanga jangjaogo.
Pakistan’er Army, Navy aser Air Force lenirtemi taoba ita 15 tsüngda Russia kanga semdangba sülen par linüki MI-35 attack helicopter tayimtsü 4 tashi Russia nungi alizüktsü tezüngzüktep agiba osang alima dang tawa sangokja liasü.
Pakistan-i maneni Russia nungi Su-35 fighter jet tayimtsü alizüktsü lenmang bushiba osanga angazükogo.