Russia Parliament-i Putin nem sepai amshitsü tashi agütsü

Moscow, September 30 (Agencies) : Syria nung Russia nunger sepaitem mapa lemzüktsütsü aser tayimtsü amshia raratsü atema Bodbarnü Russia parliament-i tir Vladimir Putin nem temelaba agütsüogo.

Russia-i Syria nung Tir Bashar al-Assad indang sorkar sepaitem pusemer aser parnoki Islamic State kiralongrartem aser West linüktemi yariba telungpurtem anema rarar.

Kremlin administration nung tanishir Sergei Ivanov-i Federation Council nung vote agitepba sülen ashiba agi, “Iba ya Syria atema lir.”

Syria nung Russian sepai indang tayimtsütemi kiralongrartem aliba tesem amaker ta Middle East nungi osang kar lir saka iba atema Russia-i telangzüba kecha magütsü.

Russian parliament-i Putin nem sepaitem amshitsü tatemsa agütsübaji yaküm Russia-i Ukraine nungi Crimea rakzükba mapang liasü.