Russia tayimtsü kazüka yokba atema taidok memeshitsü: Davutoglu

Brussels, November 30 (Agencies): Russia’er jet tayimtsü anüng tom nungi kazüka yokba atema Russia dang taidok memeshitsü lemtetba osang ka Turkey Ato Kilonser, Ahmet Davutgolu-i tanü Hombar nü sangoktsüogo.

Turkey nungi temelaba magi par lushi temalen anüng nung ayimba yong Turkey’er mitkar tayimtsü anati Russia’er jet tayimtsü ka Turkey-Syria arrtsülen taoba hopta anüng tom nungi kazüka yoka liasü.

“Ozü mitkartemi pei linük kümzüka ayutsü tangatetba nung tim mapa inyak,” ta Davutoglu-i North Atlantic Treaty Organization (NATO) lenisang, Jens Stoltenberg den tanü Brussels yimti nung ajurutepa senden ka amenba sülen metetdaktsü.

Russia Tir, Vladimir Putin-ia tang Turkey anema benokba rongsenren tenokdangbaren agientsü imlaba olen ka paisa sangoktsü.

Russia-i Turkey nung yangluba osettsüset malizüktsü, Russia nung contract mapa inyaker Turkey sensotem nem mapa inyaktsü temeten magütsü aser Russia nung tentetba Turkey company-tem inyaksangshi nokdangtsü densema Russia-i tang Turkey anema tenokdangba sentong benoka lir.

Ano külen, Turkey-i taoba Mongolbar nü anüng tom nungi kazüka yokba tayimtsü anishir ka indang tasümang Russia tanü tongtsüba osanga angazükogo.