Russia Tir den tokteper lenir ka dak tzü tanen shiloktsü

Moscow, March 21 (Agencies) : Russia Tir Vladimir Putin den tokteper lenir ka dak memetetba nisung kati tzü tanen shiloktsü, ta osangbenertemi ashi.
Iba tatalokba ya Barnaul, Siberia nung iba lenir, Alexei Navalny nübuyim sentong akaba mapang atalok, ta Hombarnü osangbenertemi metetdaktsü.
Aji oda süaka Alexei Navalny dak tzü tanen shiloktsüsangji mepushidaktsüi jentet.
Ketdangsertemi ashiba agi, Russia nung tzü tanenji komo nung anütsü asoshi amshir aser iba tzüji nisung teküp nungi anogo aii moui alir, saka timtembo kecha magütsür.
Navalny-i, “Ni mezüngbo kü dak shiloktsüba tzüji acid asütsü amai bilem, saka khen lirang ‘Shrek’ animated film nung adoksang green ogre amai akümba angu, ” ta social media ajanga asayamenüa ashi.
“Ni Barnaul nung, ni The Mask! film nungi amai headquarter ka lapoktsü. Kü tepo-a tanen kümogo!” ta pai Twitter nung asayamenüa tweet asü.
Teraksa anema nokdaksang, Alexei-i 2018 küm Russia nung Tir election nung tokteptsü asoshi Barnaul nung pa indang headquarter lapoktsü aoba liasü, ta osangbenertemi ashi.
2011 aser 2012 nung Moscow nung sorkar anema longkak kar aitba mapang Navalny-i ya aikati meteta aküm.