Russia Tir, Putin-i India semdangba mapang tezüngzüktep 20 shi agitsü

New Delhi, Mongputeni/October 04 (Agencies): Yangtepnü/Brihostibar aonung Russia Tir, Vladimir Putin linük yimtiba, New Delhi tonga arutsü aser Rogonü/Hokolbarnü pai India Ato kilonser, Narendra Modi ajurutsü sentong lir.
India-Russia bilateral summit nung adentsü atema Putin-i anogo ananü India semdanger, aser iba mapang nung India aser Russia nati defence, nuclear energy, space aser rongsenkettsüng sector tem nung tezüngzüktep 20 shi agitsü imlar, ta osang ka ajanga metetdaktsü.
India-Russia counter-terrorism joint exercise, Indra-2018, Yimpoksüi/November 18 nungi 28 nü tashi agitsü sentong lir, aser iba dak sendakba onüka jembitsü.
Yakünü Putin indang foreign policy ketdangser, Yury Ushakov-i, Russia Tiri ketdangsüa S-400 air defence systems tezüngzüktep agitsü, ta sangdonga liasü. Iba tezüngzüktepji sen US sen billion 5 shi jenjang lir.
Vladimir Putin-i Mongputeni/October 04 – 05, 2018) anogotem nung India semdangba mapang pai India Ato kilonser, Narendra Modi den linük ana tesendaktep atema senden amentsü.
Tawa External Affairs Ministry-i sangdong ka ajanga, “Tir Putin-i Ato kilonser, Modi den senden amentsü. Paisa Tir (Ram Nath Kovind) ajurua senden amentsü aser tanga official nüngdaktem jembitsü,” ta sangdonga liasü.
Küm shia India-i tanga linük den tesendaktep senden amenba linük anaji Russia aser Japan linük na dang lir.
India-Russia linük tesendaktep ya 2010 küm Special & Privileged Strategic Partnership jenjangi-i ajungketa liasü.
Putin-i India semdangba mapang nung missile atema tezüngzüktep agitsü imlar.
Tesüsabuba India-Russia annual bilateral summit 2017 küm Aami/June 1 nü Russia nung mena liasü, iba mapang nung Modi-i Russia semdanga liasü.