Russia Tir, Putin-i Japan PM, Abe den ajuruteper

Moscow, September 02 (Agencies): Russia Tir, Vladimir Putin aser Japan Ato Kilonser, Shinzo Abe nati tanü, Hokolbar nü ajurutepa senden amenba osang jangjaogo.
Par linük ana tsüngda adokba ali lushi den sentakba mangatettep ken o angatetteptsü nükjidong nung lenir anati tanü Russia kübok Vladivostok nung ajurutepa senden amen.
Ajisüaka, World War Two (WWII) mapang nungi benshiba mangatettep ken angatetteptsüsa tenati tanü mejembiteti anogo süidaktsüba osang angazükogo.
Japan-i Northern Territories aser Russia-i Southern Kurils ta ajaba Pacific tzüyim nung densemba asetkong 4 den sentakba mangatettep ken o bentettsü asoshi Abe-i ajungshia aruba sülen pai tan Russia semdanga Russia lenisang, Putin den ajuruteper lir.
Kasa ken o angatetteptsü atema par Japan linük taküm küm tatemlen semdangtsü atema Abe-i Putin jaokba osanga jangjaogo.
“Russia kübok Sochi nung taküm May ita ajurutepdang tenzükba yimjung mapatong takok ngua inyaktsü temulungtetba lir. Iba tangatetba nung Japan-i Sochi nung benokba onük shisadangtsü tenzüka lir,” ta Putin-i tanü senden nung metetdaktsü.
“Ozü linük ana tsüngda adokba mangatettepbaren bentetba jakdang teinyaktsü  jenti lir aser iba yongji, tanü lenir anati ken o tembanga mejembiteti süidaktsüogo,” ta Putin’er otongdar, Dmitry Peskov-ia osang jangjashitsü.
Paisa ashiba agi, Abe-i tan Russia semdangba ajanga par Japan linüki Russia den rongsenren tesendaktepa tajungba küma yanglushitsü alizüng ayuba kuli angur.
Lenir anati Kurile asetkong den sentakba ken o tarutsü mapang benoka jembitsü bangjemba olen ka Russia Foreign Minister, Sergei Lavrov-ia tanü metetdaktsüogo.