Russia Tir, Vladimir Putin-i US amokmerener

Greece Ato Kilonser, Alexis Tsipras (Achijilen) aser Russia Tir, Vladimir Putin nati Greece kübok Athens nung osangbener den aroki ajurutepdang agiba noksa ka yangi angur. (Athens, May 28)

Athens, May 28 (Agencies): United States-i Europe nung missile defense system amenokba atema tapet telangzüba agütsütsü amokmerenba olen ka Russia Tir, Vladimir Putin-i metetdaktsüogo.
Tang Greece semdanga alisang, Putin-i Athens yimti nung Greece Ato Kilonser, Alexis Tsipras den ajurutepa senden ka amenba sülen osangbener den aroki ajurutepdang iba olenji sangoktsü.
“US-i Europe kübok Romania aser Poland na nung par missile defense system amenokba ajanga ozü linük arrtsü tonga par tashi amshitsü tenzüker lir. Anungji, ozü linükia US nem tapet telangzükba agütsütsüsa akümtsü,” ta Putin-i ashi.
Paisa ashiba agi US nem telangzüba agüja, Romania aser Poland nüburtemi taküm tetsübo nung alitsüsa par Russia-i maparen inyaktsüsa akümtsü.
“Ozü linük kümzüka ayutsü maparen ya ozü linüki tamasa inyaker masü saka ozü linük amokmerenba atema telangzükba agütsür ta alimai angatettsüla,” ta pai shisem.
Ajisüaka, par linüki telangzübaji kechi yimya nung agütsütsü iba olenbo Putin-i memetetdaktsü.
Ano külen, Putin-i tan sangoktsüba amokmerenba olen nem Washington-i tang tashi telangzüba kecha agüja mali.
US aser North Atlantic Treaty Organization (NATO) nati aroki lungjemer Deveselu ta ajaba missile system Romania nung tan May ita tetenzüklen amenok saka Russia amokmerentsü atema masü saka Iran anemtsü nükjidong nung iba missile system-ji amenokba osang ka US mitkar lenirtemi metetdaktsüogo.