Russia, Turkey aser Iran linüktem Syria kümzüka ayutsü sign sütep

Astana, May 4 (Agencies) : Astana nung Damascus yimsüsürtem aser Syria nung opposition telok na ceasefire olemtep akaba sülen Brihostibarnü Russia, Turkey aser Iran linüktemi Syria nung lendong maliba tesem mesemteta ayutsü asoshi tenangzüktepba ka sign sütepa yuogo.
“Astana nung yimyjung olemtep akaba ajanga item linük asemi iba tenangzüktep nung sign asü,” ta Kazakhstan Foreign Minister, Kairat Abdrakhmanov-i ashi.
Syria opposition telok nungi züngsem anabo iba senden nung Iran adenba ajanga medeni ao, ajisüaka parnok telok nungi timba ka iba sign asüba sentong tema aden, ta osangbenertemi metetdaktsü.
“Iran-i iba tenangzüktep nung sign asütsü temeten mali kechiba süra parnokji lendong agütsür linük ka lir,” ta opposition züngsem kati ola tulu adoka Abdrakhmanov o tejembidak nung jangajunga arongloktsü.
Iba tenangzüktep nung sign asüba sülen Syria sorkar telok nungi tekolakba, Bashar al-Ja’afari-i parnok anemer kati arongloktsübaji tongtibang masü ta ashi aser parnoki Iran aitsübaji o agi jembirbadang ta shisem.
Russia telok nungi lenir Alexander Lavrentiev-i, ibai lokti ka inyakyim nung mashi malu sayuba mapa lir, ta ashi.
“Iba ya ajanga nija mulung nung bilemba temai adokba aser opposition inyakyim nung tashi maitba sayur,” ta Lavrentiev-i ashi.
Pai, Syria sorkar nungi züngsemtemia temulung shiranga bilemba jenti lir, ta shisem.
Abdrakhmanov-i, Astana nung pungububa olemtepji July tiyong nung akatsü saka ibaji masü tsüngda Ankara nung senden ka akatsü, ta sangdong.
Syria asoshi UN nungi atakteta arusang, Staffan de Mistura-a iba olemtep sentong nung tendar.