Russia yimya memelenshi tashi tenokdangba magientsü: US

Kiev, Luroi/August 24 (Agencies): Moscow yimya memelenshi tashi United States-i Russia nem tenokdangba agütsüba magientsü, ta U.S. Tir Donald Trump indang national security adviser, John Bolton-i Rogonü metetdaktsü.
2016 U.S. tir election mapang Russia tiyongi aita shilem agi, ta aija Washington-i Russia nem rongsenketsüng tsütsü tenokdangba agüja lir. Saka Moscow-ibo iba taitsüba ya magizüker.
“Tenokdangba agüja aliba inyakdar aser aginüba ama Russia-i yimya memelenshi tashi alitsü,” ta Bolton-i Kiev nung osangbener senden ka nung ashi.
Bolton, shibai Rogonü Ukraine Tir Petro Poroshenko den ajurutepa liasü, paisa ashiba agi, North Atlantic Treaty Organisation (NATO) nung adentsü asoshi Kiev renloka odagi, saka ano mapa aika inyaktsü lir.
“NATO züngsem akümtsü asoshi mitkar aser yimten yimsüsüba tsütsü Ukraine-i nüngdakba peritsütsüla,” ta Bolton-i ashi.
“Terenlok lir ta ni shiteter saka ano tali inyaktsüla,” ta paisa shisem.
NATO tuluba küma aoba asoshi Russia-i kanga sashia nokdaker aser Russia den tembar tajung, Ukraine tir Viktor Yanukovich menden nungi atsüngdokba sülen 2014 küm Crimea ya Ukraine nungi rakzük.
Ukraine nung mangatettep adokba ya anentsü tongtibang aser Crimea aser Ukraine anüdoklen tensa aliba ama yutsünungbo lendong tulu adoktsü, kong Moscow-i Kiev den raratsü asoshi separatist tem busemer, ta Bolton-isa ashi.
Maneni taruba küm Ukraine tir election agiba mapang Moscow-i shilem agiba nungi nokdangtsü asoshi Bolton aser Poroshenko na bangjemtepa liasü.