Russia’er tenokdangba mapang atsülangshitsüla: Merkel & Hollande

Berlin, December 13 (Agencies): Alima tashi abenba linüktemi Russia anema tenokdang sentong benokba mapang talangba küma atsülangshitsü tajungshiba olen ka France Tir, Francois Hollande aser German Chancellor, Angela Merkel nati tanü, Mongolbar nü metetdaktsüogo.
Russia-i 2014 küm Ukraine ket nungi crimea peninsula tashiyim agi agiba den Ukraine sorkar anema nokdaker, Ukraine anüdoklen alirtem pusema, Ukraine sorkar aser sorkar anemer na tsüngda agiba yimjung tezüngzüktep mapa küma meinyaktettsüsa inyaksaba ken o nung ajemdaker, alima-i Russia linük anema tenokdangba sentong benoka lir.
2014 küm nungi tenzüka, Ukraine sorkar aser Russia-i pusema nungiter Ukraine sorkar anemer na tsüngda tongpang kanga sashia raraba ajanga tanü tashi nung nisung 10,000 dak tema asüba osang bushiteta lir.
Par telok anati mangatettepbaren benteta, yimjung nung alitsü nükjidong nung Belarus yimtiba, Minsk nung yimjung tezüngzüktep ka 2015 küm agi saka iba tezüngzüktepji tanü tashi mapa küma meinyakteti lir.
Russia anema tenokdangba sentong benokba mapang atsülangshitsü mesüra kasaji anentsütsü atema onük benoka jembiteptsü atema European Union (EU) lenirtemi tan Brehostibar nü senden amentsü jatepa lir aser iba senden amentsü anogo 2 jakdang Hollande o Merkel nati tan tajungshiba olenji benoker lir.
Germany yimtiba, Berlin nung ayongba Franco-German digital economy conference nung shilem agitsü atema Hollande-i tang Germany semdanga lir aser pai Merkel den iba mongdang tezülen ajurutepa, jurila senden ka amenba sülen osangbener den aroki ajurutepdang tenati tanü tajungshiba olenji sangoktsü.