Russia’er toktepa jajar ket nungi Olympic medal meyipa agir

London, March 24 (Agencies): Court of Arbitration for Sport (CAS)-i International Association of Athletics Federations (IAAF)-i benokba ken o angadangba sülen Russia’er toktepa jajar, Olga Kanishina aser Sergey Kirdyapkin na ket nungi 2012 London Olympics medal meyipa agitsü obendang tanü, Brehostibar nü agütsüogo.
“Russian anti-doping agency (RUSADA)-i par asayartemi ozüng alema mozü mora achiba osang miimbanga ayur,” ta shia, RUSADA-i benokba par asayar 6 indang ozüng alema mozü mora achiba osang tanaben reprangtsü ken o IAAF-i benoka liasü.
Aji oda, Kaniskina o Kirdyapkin na asayar 6 rong nungji densemba osang jangjaogo.
2008 Beijing Olympics champion, Kaniskina-i London Olympics nung agizükba medal densema, lai August 15, 2009 nungi October 15, 2012 tsüngda agizükba takokba ajunga meyiptsütsü asoshi CAS-i tuyuogo.
Kirdyapkin-ia 2012 küm agizükba Olympics gold densema, pai August 20, 2009 nungi October 15, 2012 tsüngda agizükba takokba ajunga meyiptsütsüsa jenjang ajurur lir.