Moscow, February 11 (Agencies): Russian Orthodox Church lenisang, Patriarch Kirill-i tanü, Brehostibar nü Moscow toktsür Cuba bushia aoba osang ka par ketdangsertemi metetdaktsüogo.
Kirill-i Cuba tonga aoba sülen alima ajunga nung Roman Catholic tamangba yimsü lenisang, Pope Francis den Havana yimti nung tentetba José Martí International airport nung asüng, Hokolbar nü ajurua senden ka amentsü.
Kirill-i Francis den ajurutepba sülen Cuba Tir, Raul Castro dena ajurutepa par Cuba linük semdangtsü sentong renema lir.
Kirill aser Francis nati tan ajurutepa senden amentsü asoshi sentong renembaji East aser West na tsüngda Khristan tamangba yimsü ana küma sadanger küm 1000 shi bendanga aliba agiena tanaben sentaktepshitsü mera tongti ka agir alitsü.
Kirill o Francis nati asüng senden amenba sülen tenati tongti tezüngzüktep ishika zülutepa agitsü sentong renemba osang angazükogo saka tenati kechi tezüngzüktep agitsü iba osangbo alima dang metetdakja mali.
Francis-ia Kirill den senden amenba sülen, taoba mapang sentong renemba ama Mexico semdangtsü asoshi Mexico bushia aotsü.
1054 AD nungi tenzüka mangatettep adokba sülenbo Catholic lenisang aser Orthodox lenisang nati tan mezüngsüa tsüngdong ajuruteper asütsü.
You must be logged in to post a comment Login