Russia:Taküm küm Su-34 fighter-bombers 16 bendenloktsü

Moscow, March 10 (Agencies) : Russia Aerospace Defence Forces nung taküm, 2017 küm Sukhoi Su-34 fighter-bombers 16 bendenloktsü, ta Hokolbarnü Russia Deputy Defence Minister Yuriy Borisov-i ashi.
“Novosibirsk Aircraft Production Association (NAPA)-i Su-34 strike fighters 92 yanglutsü asoshi Russia Defence Ministry den contract mapang talangka atema yanglua lir. Taküm onok keti iba tayimtsü 16 tonga arutsü,” ta Borisov-i ashiba osangbenertemi metetdaktsü.
Borisov-i, tang tayimtsü 16 rongnungi 9 bo renema amentepba mapang lir aser item tayimtsü ya Syria nung telungpurtem den raratsü asoshi kanga tashi tait aser tajung, ta ashi.
Iba tayimtsü dang tanü asüng tensa den apetba tayimtsü ta ajatsü akok, ta pai shisem.
Su-34 tayimtsü ya 2014 küm tetenzüklen nungi amshitsü tenzük. Iba tayimtsü amshia ali aser tzü nung aliba ajak maktetba dang masü saka anüngdang aser aonung mapangtem nung dena rarateter. Iba den külemi Su-34 tayimtsü agi tsüngsang mopunga mashishir.