Ruth Wilson-i ‘The Book of Ruth’ nung shilem agitsü

Tsüklai/February 18, 2020 (Agencies): Ruth Wilson aser Matt Bomer nati ‘The Book of Ruth’ film nung shilem agitsü. Iba film ya AIDS awareness advocate Ruth Coker Burks taküm otsü asütsü.
Arishi küm 38 actress Ruth aser küm 42 tain Matt napronglai tongti shilem agitsü aliba film ya Michael Arden-i direct asütsü ternemba lir, koba pa indang mezüng film asütsü.
Iba project atema Rebecca Pollock aser Kas Graham nati screenplay zülutsüdar.
Arden-i ashiba agi, ”Timtem mapang ka nung meimchirtem atema bilemja khuret abener nisung taküm ka indang otsü yanglutsü ya maongka aser konang ama bilemer.”
”AIDS tashidak ajanga alima nung meimchir jenti asübatem bilemtettsü ya asenok atema tongtibang aser Ruth densema nisung aikati pei mapa tajung toktsür iba ama timtem ajangshiba mapang ka nung iba tashidak den raratsü asoshi taküm bendanga agüja inyakogo,” ta Arden-i ashi.
Iba film nung Wilson-i Ruth shilem agiba angutsü. Ruth ya bendanga agütsüba Khristan taküm ka, shibai AIDS tashidak agi kongshir timtem tia nung alirtem asoshi anepalur ka akümtsü mulungtet.
Kasa film nung Bomer-i Ruth’er kidanger, shiba pa kinungtsü asüba sülen New York-i oadoker, iba nisung shilem agitsü imlar.
Producer temi ashiba agi, ”Tetsüri tongti shilem agiba film ajanga meimchir timtem tia nungi anitetba indang sayutsü aser iba den külemi Ruth Coker Burks-i meimchir atema lai bendanga agüja tajungtiba inyakbatem bilemtettsü.”
Sarah Lebutsch-i Cora Palfrey den külemi executive producer ama inyaktsü.
TV series ‘The Affair’ aser ‘His Dark Materials’ nung shilem agiba sülen Wilson-i tanaben film nung shilem agiba angutsü.
2018 küm sayaba gothic drama ‘The Little Stranger’ nung lai shilem agiba ajaki jangjaa lir. Kasa küm Bomer-ia ‘Viper Club’ nung shilem agia liasü.