Ruzazhomi yimertemi Khwushopra Veswuh kukua aitsür

Dimapur, June 26 (TYO) : Khwushopra Veswuh-i arishi küm 13 tain tetsür tanur ka dak küm ka tema tashiyim mapa inyakba kukua aitsür ta Ruzazhomi yimtsüng nungi loktitentet 5-i külem sangdong ka nung metetdaktsü.
“Iba ama tesempatsü mapa ajanga sensosangertem kanga mezüngmeshiogo anungji sensotemi kukua aitsür. Khwushopra Veswuh ji Ruzazhomi yimer lir saka pai mapa tamajung inyakba nung yimeri pa pu masemer, saka ozüng amertem dang tekaratiba nung ozüng tesashi agi pa merenshitsü aser takoksa ajurur nem temeten agütsütsü atema takhangba agütsür” ta Ruzazho Village Council Chairman Jolelhu Veswuh, Ruzazho Welfare Union Kohima Chairman Japra Swuro, Ruzazho Village Women Society Chairpreson Vetalu Swuro, Ruzazho Youth Federation President Vegulhu aser Ruzazho Students’ Union President Kuduvo Swuro nungertemi sangdong nung shia lir.
Naga Yimten Telok ka nung züngsem ka asüba tenüng amer prangpong agi nisung ka amokmerena maongka agitsü merangba inyakyimji yimertemi magizüker. Anungji ozüng amertemi IPC nung ajemdaker nisung amokmerenba aser tetsür tanur dak tashiyim mapa inyakba ken o tem nung aitsütsü ayongzüker. Bangdakpurtemi Khwushopra Veswuh bail nung mechioktsü atema akhanger kechiyong pa chiok nungbo tanutsüla aser lar kibong lendong ajurutsü ana nung lir, ta Ruzazhomi lennirtemisa metetdaktsü.
Ozüng amertemi iba temepishiba magizükra Ruzazhomi yimertemi onoki junger ta bilemba mapa inyaktsü aser iba tebilemtsü khuretji bangdak ketdangsertemi  abentsü, ta parnokisa shisem,
NSCN IM aser tanga teloktem ajaki mapang shitak nung mapa inyakba atema kanga pelar, ta Ruzazho Village Council, Ruzazho Welfare Union Kohima, Ruzazho Village Women Society, Ruzazho Youth Federation aser Ruzazho Students’ Union President nungertemisa metetdaktsü.