S Africa-i Zuma Tir menden nungi anentsütsü telemtetba agitsü renemshir

Cape Town, April 03 (Agencies): South Africa parliament yimsüsürtemi par Tir, Jacob Zuma yimsüsütsü menden nungi anentsütsü mesüra Tir menden maneni bendaktsütsü telemtetba taruba Moonglar nü agitsü renemba osang ka National Assembly Speaker, Baleka Mbete-i tanü, Deobar nü metetdaktsüogo.
Zuma-i linük temzüng anema inyakba ken o nung aiogo ta Constitutional Court (CC)-i obendang agütsüba sülen parliament yimsüsürtemi Zuma Tir menden nungi anentsütsü mesüra oda Tir mendenji maneni bendaktsütsü telemtetba agitsü renemshir lir.
Zuma-i pa aliba ki tajungba küma yanglushitsü atema sorkar senpong nungi agizüka amshiba dollar sen million 16 shi meyiptsütsü asoshi okadaki tuyu saka Zuma-i pa dang tuyuba ama meinyakba ajanga pai linük temzüng alema inyak ta shia, CC-i pa tan Brehostibar nütu aitsü.
CC-i iba obendang agütsüba sülen opposition telok aser nüburtemi Zuma Tir menden nungi anentsü takhangba benoktsü tenzükogo.
Nübur aser opposition telok tenüng nung Democratic Alliance opposition telok lenisang, Mmusi Maimane-i Zuma Tir menden nungi anentsütsü ken oa okadak benokba osang jangjaogo.
Pa Tir menden nungi anentsü takhangba benok aka, S Africa parliament yimsüsür timbaka Zuma-i aniba Africa National Congress (ANC) yimtenren telok nungi aliba yong parnoki Zuma kümzüka ayutsüsa tang jenjang lir.
Aji oda, parliament-i Zuma Tir menden nungi manentsü aka, par ANC telok rong nung Zuma anemer telok tenteta parnoki tarutsü anogotem nung Zuma den lenitsü menden atema rakteptsüa ana nung dang lir.
Ano külen, pai linük temzüng anema alibelenogo ta okadaki obendang agütsüba sülen arishi küm 73 tain Zuma-ia taidok meshia pa dang tuyuba ama, pai agiba sen sorkar senpong nung tanaben inoktsütsü tenangzükba olen ka tan Hokolbar nü metetdaktsüogo.