S Arabia nung Punjab nunger ana tepsetba aitsür: Punjab CM

Chandigarh, April 18 (Agencies): Saudi Arabia linük nung Punjab nunger ana tekolak danga tepsetba atema Punjab Chief Minister, Amarinder Singh-i iba tatalokba aitsüba den külemi pai India Ministry of External Affairs (MEA) dang nungi osang tejangja meshitsü, ta metetdaktsü.
Osang angazükba agi, nisung tepsetba ken o ka dak sendakba nung Punjab nungi tebur ana- Hoshiarpur nungi Satwinder Kumar aser Ludhiana nungi Harjeet Singh na tepset.
Amarinder Singh-i ashiba agi, iba tatalokbaji February 28 nü atalok ta MEA dang nungi jangjaogo. Tanü ama tangatetba putu ka nung maneni iba yimya nung nisung tepsetbaji mamangteter, ta paisa ashi.
Amarinder Singh-isa, MEA-i ibaji menokdangtet aser tebur ana tepsetba osangji memetetdaktsü, ta aitsü. Satwinder kinüngtsüi Hoshiarpur district nung temepishiba ken o ka agütsüba sülen ang MEA-i iba osang metetdaktsü, ta pai ashi.
Amarinder Singh-isa, pai External Affairs Minister, Sushma Swaraj dang iba osang tejangja meshitsü aser tebur ana anemji legal teyari agütsür asü magütsü, ta asüngdangtsü, ta metetdaktsü.
“Temerenshi agüja tepsettsü osangji jelia Saudi Arabia nung aliba Indian Embassy nem magütsü asünungbo, aser asür ana nem legal teyari magütsü asünungbo ibajibo meimchir temeden anema inyakba asütsü,” ta paisa ashi.
Singh-i UN aser meimchir temeden organisations danga, iba ya meimchir temeden alema lir, anungji Saudi Arabia dang akhidang nisung tepsetba yimya nung tepsetba anentsü tuyuang ta metetdaktsü.
Osang angazükba agi, asür kinüngertemi tasümangjia mangu, kechiyong Saudi Arabia nung iba tenokdangbaji lir. Iba dak sendakba nung chief minister-i Swaraj dang Saudi nung temaba ketdangsertem matsüngdang benoka jembiang ta mepishitsü, ta metetdaktsü.
Asür kinüngertem nem tasümang agüja asüpila agitsüa memela, aser ibaji taoksatsü osang ka lir, ta paisa ashi.
Nüngdak dang süra Ato kilonser Modi-ia tiyongi aita inyaktsüla aser tasümang bener arutsü atema inyaktsüla, ta paisa shisem.