S.C.Jamir amokmerenba aitsür

Dimapur, June 19 (TYO) : Odisha Angh, Dr.S.C.Jamir taküm anema telung nung alir Maoist teloki amokmerenba mapaji kanga sashia aitsür aser India government-i ibaji kanga süoki ia agitsüla, ta Ao Senso Telongjem Dimapur (ASTD) sangdong ka nung Tir Wb.Supu Jamir aser tongti zülur Wb.C.Onen Walling nati metetdaktsüogo.
Dr.S.C.Jamir ya Nagaland akümer rongnung taküm alirbo pa dang lir aser tang tashi nung Tsüngremi pa taküm tsükchir ket nungi meteta pongoben tashi kümzükogo. Iba ama nisung ka anema amokmerenbaji pa amenba yimsüsüba mendenji dang masü saka linük temzüng anema inyaker ta India government-i metettsüla, ta ASTD-isa metetdaktsü.
Parnokisa kasa maparen nung Central Nagaland Tribes Council teloki mapang shitak nung ken o shitak metetdakja inyakba asoshi pelar, ta metetdaktsü.
“Kong südir süaka senso tajung ka taküm amokmerenba mapa anema onoki sashia nokdaktsü renema lir,” ta ASTD-isa metetdaktsü.