S.C.Jamir tetsü Wt.Takatula süogo

Dimapur,March 12 (TYO) : Alima nung jangratema arishia küm noklang dak tali taküm tajung nung lia arur, Honibar nü Dimapur nung lar jala Wt. Satempokla’er kidang anepalua lia, Watsü Takatula alima nungi pilaogo.
Lar chirtem rongnung tambusangji tang Odisha nung angh Wb.Dr.S.C.Jamir lir. Tang taküm alir par chir tenet rongnung tebur 4 aser tetsür asem den semchir 31 aser puiner 52 toktsür la nem Tsüngremi agütsüba arishi tembanger alima nungi pilaogo.
Lar chirtem rongnung ano Nagaland nunga Urban Development Adviser & MLA Imtisungit Jamir aser semchirtem rongnunga Parliamentary Secretary, C.Apok Jamir aser SCERT nung Director Wt.Limasenla nungertem lir.
Asür Takatula kinungbo Wb. Senayangba 1988 küm asü. Pa ya Mokokchung district nung nüngtugu Dobashi ka liasü.
Tanü Wt. Takatula asüba osang angashia, Nagaland Chief minister, T.R.Zeliang, Lok Sabha MP Wb.Neiphiu Rio aser Parliamentary Secretary, Dr.Benjongliba nungertemi asür kinungertem den mangyim jashi lemsatepba osang metetdaktsüogo.
Chief minister, T.R.Zeliangi mangyim jashi lemsatepba osang ka nung, Head Dobashi asür Likokyangba’er jala Takatula Wb.Jongshinokdang’er jabaso Senayangba den kibong akümbaji kanga tetemsü aser tapet ka liasü, kechiyong Wb.Jongshinokdang ya “Order of the British Empire (OBE) naroküm agizükba nisung ka liasü aser pai Tsüngrem tenzüker Rev.E.W.Clark Ungmai jaoka nübortem nem Khristan yimsü agizükdaktsüba temoatsü nisung liasü ta metetdaktsü. Lar chirtem state nung tematiba menden nung liaka, la ya kanga ajemalu aser Tsüngrem akümtsübuba tetsür ka liasü. La shirangba kodanga mangashidang ta T.R.Zeliangisa metetdaktsü.
“Nagaland nung aliba nübortem aser ozü kibong tenüng nung nenok ajak den mangyim jashi lemsateper aser Tsüngremi nenok nem tesünep agüjang ta sarasademtsür,” ta Chief minister-isa metetdaktsü.
Lok Sabha MP Wb.Neiphiu Rio-isa asür kinungertem den mangyim jashi lemsatepba osang ka nung, ” asür Takatula ya jakla tajung aketba tasü tait tetsür ka liasü. Lai alima tensa mapang tamajung jenti ajangshiogo aser item ajakji kokteta ajak asoshi tatishitsü tajung asütsüsa litetogo,” ta Rioisa metetdaktsü.
Ano, Parliamentary Secretary Dr.Benjongliba Aier-ia asür kinungertem den mangyim jashi lemsatepba osang ka nung, ” Wt.Takatula ya ochishir, tenendak aser meranga inyakba tetsür ka liasü. La ajanga linük lenitsü asoshi nübo tajung aika moatsüogo. La meliaka la mapa tajung nübortemi teti bilemtettsü,” ta metetdaktsü.
Honibar nikongdang lar jalaer kidang sarasadem sentep mapang ka agir la temang lar taso yimkong Ungmai bener tuogo aser yangji Deobar nikongtsütsü 1:00 ako nung asü pila sentep alitsü sentong renema lir.