S.Chuba Lkr-i Yaongyimti Old yim süngküm lapoktsü

Mokokchung, October 28 : Tanü Veterinary & Animal Husbandary Parliamentary Secretary, S.Chuba Lkr-i Yaongyimti Old yim süngküm lapoktsüogo.
Tanu iba süngküm lapoktsüba sentong agir külen Parliamentary  Secretary-i pa adokba constituency (24 Angetyongpang) nung aliba yimtsüng Yaongyimti Old, Yaongyimti New, Pangsang aser Chakpa ta yimtsüng pezü (4) semdanga item yimtsüng pezü-prongla nung yimsüsürtem ajurua sensaksem sentong kanga dang takok ngua kaogo.
Tanü item yimtsüng pezü nung Parliamentary S.Chuba Lkr-i yimsüsürtem den ajurutepa jembidang pai yimtsüng ka terenlok maparen inyaka  nüburtem tejakleni anitsüji  kanga dang tongtipangtiba lir aser ibaji yimsüsürtem asoshi khuret tulutiba lir, anungji yimtsung ka aser yangji aliba nüburtem tejakleni anitsü asoshi yimsüsürtem longjema alitsüla aser shisa akatsüla ta yimsüsürtem ajungshia jembi.
Parliamentary  Secretary-isa alima tejakleni renloka aoba den külemi yimtsüngtema tejakleni aotsü kanga dang tanü putu nüngdak tulutibaji lir, yimtsüng ka tejakleni aotsü asoshi tongtipangtibaji nüburtemi sorkar den teka amtepa alitsüla, anungji yimtsüng tejakleni aotsü asoshi Naga lima nung tang aliba NPF-i aniba sorkar den teka amtepa alitsü kanga dang tongtipang lir ta shisem.
Alima nung terenlok akatsü asoshi lenmang tapu aika lir saka ajak rongnung tematibaji nübur tsüngda telongjem aka nung dang terenlokji tesademba nung bener arutettsü, anungji yimtsüng nung nüburtem longjema alitsüla ta S. Chuba Lkr-isa ashi.
Tanü Parliamentary  Secretary-i pa adokba  24 Angetyongpang Assembly constituency nung aliba yimtsüng Yaongyimti Old, Yaongyimti New, Pangsang aser Chakpa ta yimtsüng pezü (4) ta semdanga item yimtsüng pezü-prongla nung yimsüsürtem ajurua sensaksem akadang yim pezüprongla yimsüsürtemi 2018 küm agitsü aliba General Election nungji S.Chuba Lkr den akokba lenmang ajak nung tajungtiba agi yaritepa aotsü asoshi lemsatepa jembitepogo.