S.Chuba Longkümer-i par constituency nuburtem ajurua shisa lemsatep

Parliamentary Secretary S.Chuba Longkümer-i 24 Angetyongpang A/C nung lenirtem ajurua senzüba mapang nung Yaongyimti Old nung tangokba noksa.

 Mokokchung, November 24 (TYO) : Veterinary and Animal Husbandary Parliamentary Secretary S. Chuba Longkümer-i November 23 aser 24 anogo par 24 Angetyongpang A/C nung aliba yimtsüngtem ajak nung yimsusurtem aser NPF Party lenirtem ajurua nübur nüngdaktem aser NPF Party nüngdaktem lemsatepa jajaogo.

S.Chuba Longkümer-i par constituency nung yimten yimsüsürtem aser Party lenirtem ajurua sensakdang pai Nagaland nung NPF-i aniba sorkar tenteter aoba mapang nung telok ana kümer külen rongrong adoka mesüngjemteti aruogo aji saka politics yimya dang asünung item ajakji süsümedema tembanger asenok Naga nunger asoshi kanga dang tia aka Nagaland nung Chief Minister asütsü asoshi T.R.Zeliang shimtetogo.

Iba ama tensa ka süitemer külen nüburtem shisatsü mesüngjemteti alidang onoki nüburtem asoshi teti bilema alinung Nagaland nung sorkar kanga tashi it-ita otar ta nübur nem metetdaktsütsü asoshi aruba lir ta lenirtem ajurua senzüdang S. Chuba Longkümer-i metetdakja ashi.

State ka nung Chief Minister asütsüji mapa tilaka dangbo masü khuret tulu lir saka Naga nunger nübur tia kanga dang jung junga meteter aser arok aroka shisadanger T.R.Zeliang shimtetogo.

T.R.Zeliang ya taoba mapang nung Nagaland meyonga Rajya Sabha member inyak aser Nagaland Legislative Assembly nung Minister talangka inyaker külen tanü pa ama ka nübur tia meteter Chief Minister asübaji Naga nunger nüburtem kanga dang tia taka ta Parliamentary secretary-isa shisem.

Parliamentary Secretary S.Chuba Longkümer-i 24 Angetyongpang A/C nung lenirtem ajurua senzüba mapang nung nüburtem den parnok nüngdakba lemsatepa liasü.