S. Chuba Longkumer-i “small animal restrainer’ sayatsü

Dimapur, October 19 (TYO) : October 19, 2015 nü Veterinary & Animal Husbandry Parliamentary Secretary, S. Chuba Longkumer-i Vety. Hospital Dimapur nung ‘small animal restrainer’ sayatsüogo.
Iba “small animal restrainer’ ya Veterinary Hospital, Dimapur nung mapa inyaker Neizo Chalie-i yangluba lir.
Tanü S. Chuba-i SVFA, Neizo Chalie nem tenüngsang agütsü aser ano Vety. & A.H. Director dang pelaba metetdaktsü.
“Kanga dang junga purapiteta yangluba oset nüngtugu kümdaktsüba aser service delivery system jungdaktsütsü atema Department-i tan mezüng inyaker,” ta paisa ashi.
“Tanü iba oset sayaba ya department asoshi mera tasen ka agiba lir aser tarutsü nunga shirurutem asoshi osettsüset tasenten purapitettsü imlar” ta S. Chuba-isa ashi.
Naga nunger noklang shilem agi shi achir anungji Veterinary dak sendakba maparen tajungba kümdaktsüba ajanga asenok tajangzük angutsü. Iba restrainer ya Nagaland tesem balala nung hospitals, dispensaries, farms aser institutes nungertem nung amshitettsü aser Nagaland nung dang masü saka northeast ajungalen sapua amshitsü imlar, ta Parliamentary Secretary-isa metetdaktsü.
Director Veterinary & A.H. Nagaland, Dr. Thungchamo Ezung-ia o jembidang ashiba agi, iba anogo ya purapitetsang atema dang masü saka Veterinary department atema tongtipang anogo ka lir.
Tanü sayaba “small animal restrainer” purapiteta yanglusang Neizo Chalie-i Veterinary & A.H. department dang kanga pelaba metetdaktsü.
Küm aika shiruru tem table ka nung dang yur operation agia arur aser iba mapang parnok azüoktsü atema nübo nüngdaker aser shirurutema timtem ajurur, ta Neizo-isa ashi.
“Iba atema ni mapang talangka khuret süa bilema inyakyim tasen ka puratettsüla ta bilem aser tatem nung iba ya purapitet” ta paisa ashi.
Iba sentong nung mendenji CVO, Dimapur, Dr. Temsumeren liasü, Dy. Director, DMC, Dimapur Dr. Inato Jimomi-i temoatsü meshia sarasadem aser Veterinary surgeon Dimapur, Dr. Asangla Jamir-i anküp tepela o jembi.