S Chuba Longkumer-i VHC cum Quarantine Check Post lapoktsüogo

Nagaland Parliamentary Secretary, S Chuba Longkumer-i Dimapur kübok Lotovi yimtsüng nung VHC cum Quarantine Check Post lapoktsüba noksa nung angur. (Dimapur, February 11)

Dimapur, February 11 (TYO): Nagaland Parliamentary Secretary, S Chuba Longkumer-i Dimapur kübok Lotovi yimtsüng nung VHC cum Quarantine Check Post (QCP) ka tanü, Brehostibar nü lapoktsüogo.
Tanü lapoktsüba QCP-ji Nagaland sorkar kübok Veterinary & Animal Husbandry (V&AH) Deparment-i ketdangsüba mapatong ka lir.
Nagaland nung alir ajunga peridaktsütsüsa pei state nung kiset shiruru memetsütetba ajanga kidangsüa aliba state-tem dang nungi ak aser nashi densema kiset shiruru balala bener arutsüsa akümer saka yamaji inyakba ajanga aiben nüburtem nem tashidak balala bener arutsür.
Anungji, shiruru den sentakba tashidak aser shiruru nungi meimchir dak menaloktsüba tashidak balala nungi kümzüka kasaji azüoktsü nükjidong nung tan QCP-ji tentetogo.
“Tan QCP tentetba ajanga Nagaland indang rongsenren jenjang tajungba akümtsü aser nüburtem nema tajangzük tulu bener arutsütsü. Nüburtemia V&AH Deparment den amaliteptsü ajungshir,” ta Chuba Longkumer-i metetdaktsü.
Ano, Nagaland tezülen tenzükba V&AH Deparment ketdangsertemia nübur taküm jenjang tajungba kümdaktsütsü asoshi bendanga agüja inyaktsü tajungshiba olen ka paisa metetdakja liasü.
“Tashidak balala aketba shirurutem anema aliba shirurutem den meyoktepa meyui tesem balaka nung yur anepalutsüji kanga dang tongtibang,” ta V&AH nung Director, Dr. R. Thungchamo Ezung-ia lemsatepa liasü.