S.D. Jain Girls College pur ‘College Day’ among

Dimapur, February 09, 2019: Yashi Dimapur nung S.D. Jain Girls’ College pur 26buba Freshers’ Social den Annual Day amongdang Miss SD Jain, Valarie Cooke den 1st Runner Up aser 2nd Runners Up- Kr. Soyimkumla aser Ekali Chophy nunger külemi tangokba noksa nung angur.

Dimapur, February 10 (TYO): February 09, 2019 nü Jain Temple Road Dimapur nung S.D. Jain Girls’ College-i Freshers social den College Annual Day repsema mongogo, aser iba sentong nung tongti tejaokerji Dimapur Deputy Commissioner, Kevekha Kevin Zehol liasü, ta tanü S.D. Jain Girls’ College Principal, K.C. Rout-i sangdong ka nung metetdaktsü.
Tongti tesemdangeri sentong tenzüka milen tsükloktsüba sülen jembidang pai college ketdangsertemi mapa tajung inyakba atema tenüngsang agutsü, aser kaketshirtem dang meranga inyaktsü aser tazüokba nung alitsü ajungshia liasü.
Paisa kaketshirtem dang tangar jilu majizüktsüla saka peiji pei ama alitsü ayongzük. Kasa sentong nung Kishore Kashliwal, Secretary aser Managing committee Advisor, Anil Jain natia jembia liasü.
College Principal, K.C. Rout-i kaketshirtem dang temelenshi bener arutsü atema kanga tongtibang tasüngdangbatem asüngdangtsü ajungshi.
Tanabuba sentong nung kaketshirtemi sobaliba shilem balala agia liasü.
Sentong nungsa Miss SDJain, ji Valarie Cooke shim aser 1st Runner Up aser 2nd Runners Up ji Soyimkumla aser Ekali Chophy na shima liasü.