S I Jamir-i Kohima nung Water Treatment Plant tenzüktsüogo

Jotsoma, Nov 26 (TYO): Tanü Chief Minister atema Urban Development Department Adviser aser MLA, S I Jamir-i Kohima Science College, Jotsoma nung Water Treatment Plant tenzüktsüogo.
Iba sentong nung jembidang SI Jamir-i, Asian Development Bank (ADB) nungi loan teyari agia state sorkari tzü supply, solid waste management aser septage management ama service tem nung terenlok mapatem kar tenzükogo, item infrastructures karbo atangji nung atalokogo aser tanüngbatemji kobi melii Kohima city terenlok atema inyaktsü, ta metetdaktsü.
Jamir-isa, “Kohima smart city ka akümtsü atema project tem rongnung tzü supply tajungba akumtsüji densema lir. Iba nung ya Kohima city telung aser telungtet nung tzü reservoir 17 yanglutsü aser water treatment plant yanglushiba densema lir,” ta ashi.
Paisa, sorkari Kohima, Lierie colony nung scientific solid waste management facility ka sen crore 40 dak tema intoka yanglutsü, aser iba project ji kobi melii tenzüktsü, ta ashi.
Jamir-isa ashiba agi, küm tepiyong Kohima nung tzü agi kanga anünger, aser tang city nung aliba water supply network ya network system tasenba küma yanglushiogo aser iba yagi ADB loan kübok city ajak ayimjemtsü.
Tang sorkari pump ajanga city-i tzü bener arutsü atema project ka inyakdar ta metetdakja Jamir-i PHED dang nüburtem anisüngzüktsü atema iba project nung tongtibangtibatem apir renema inyakang, ta mepishiogo.
Kohima water supply scheme ya NERCCDIP indang project ka lir aser iba project ya India aser Nagaland sorkar napronglai senotsü inoka ADB-i yarisema inyakogo. Iba maparen ya sen lakh 826 intoka yanglu.
Tanü iba sentong nung PHED Chief Engineer, Er Kevisekho Kruse-ia jembia liasü aser State Investment Programme Management Implementation Unit (SIPMIU) Additional Programme Director, Er Krosü Rhetso-i iba project nung technical report agüja liasü.