S Jaishankar-i Bhutan Chuba aser Ato kilonser ajuru

New Delhi, October 04 (Agencies): Doklam nung India aser China na tsüngda mapang talangka tensa raksatsüsa aruba sülen tang mezüng India tongti ketdangser kati Bhutan linük semdangogo.
Indian Foreign secretary, S Jaishankar-i Bhutan Chuba, Jigme Khesar Namgyel Wangchuk aser Ato kilonser, Tshering Tobgay na ajurua terenlok aser security onüktem nung o lemtepa liasü.
Osang angazükba agi, India leniri Bhutan lenirtem den senden amendang hydropower projects & pricing, GST aser India-i demonetization benokba ajanga timtem adokba dak sendakba onüktem jembi.
Tawa Doklam nung India aser China na sepaitem rara adoktsüsa tensa ajuruba sülen tensa süngjemaka linük ana maneni kanga yakyaka lir.
August 28, 2017 nü China sepaitem Doklam nungi aienshiba sülen parnok Yatung-i ao; item tesemtem ya China sepaitemi agia lir, aser joko küm ishika parnoki gari lenmang aika yanglua arudar.
Ano külen tesüiba hopta ishika India sorkar tetuyuba nung Doklam plateau anasa teshimtet tesem kar nung sepai tali lemzüktsüba den külemi raraba osettem benlenogo.
Ano china sepaitem-a asükwa atongba sülenbo iba tesem nungjagi aotsü mesüra taruba hopta 19buba party congress senden amenba sülen aienshitsüa akok.
Jaishankar-i Bhutan semdangba mapang nungsa Bhutan’er 12th five-year plan nungittsü aser 11th five-year plan tembanga inyaktsü atema inyakba maparen nung Bhutan den yariteptsü nangzükogo.
2018 küm Bhutan nung election agitsü. Bodhbarnü Jaishankar-isa sorkar tongti ketdangsertem ajurua India-i rongsenkettsüng teyari agüja inyakba project tem atema jembia liasü, aser Brihostibarnü India-i meyipa aru.