S Korea nübur meyirijang aikati sorkar anema longkak aiter

South Korea Tir, Park Geun-hye aser lai aniba S Korea sorkar anemertemi Seoul yimti nung longkak aitba noksa ka yangi angur. (Seoul, December 05)

Seoul, December 05 (Agencies): South Korea nübur meyirijang aikati par Tir, Park Geun-hye aser lai aniba sorkar anema Seoul yimti nung longkak aita yimdongsüa tanü Honibar nü jajaogo.
Parnoki taoba November ita nunga tan amala longkak aitsü sentong ayonga kanga sashia longkak aitba osang jangjaogo.
Tanü ayongba longkak aittsü sentong nung sorkar dang jashir nübur nisung 13,000 shi shilem agiba osanga jangjaogo.
Park-i aniba sorkar kübok mapa inyaker taküm tia mejungi kümdaktsüba den külemi, nüburtem nem temeten peria magütsür ta shia, pei tenük meibangba longkak aitertemi naro aser ozülu bener tanü sentong nung shilem agia liasü.
Tanü agitsü ayongba longkak aittsü sentongji nokdangtsü asoshi Park-i aniba sorkari inyakdang saka Seoul nung tentetba okadaki sorkar inyaksangshi anenja tanü longkak aittsü temelaba agütsüba osanga jangjaogo.
Taoba November ita agiba longkak aittsü sentong nung longkak aiter aser parnok nokdangi yokba police ketdangsertem na tsüngda raratep adoka nisung aika yiruba osanga bushiteta lir.
Ano külen, “Sorkar anema longkak aitertemji Islamic State (IS) kiralongrar ama lir,” ta shia, parnoki ayongba sentongtem nokdangtsü asoshi Tir Park-i ozüng tasen latettsü onük benoka lir.