S Korea nübur meyirijang jenti Tir, Park anema longkak ait

South Korea yimtiba, Seoul nung S Korea Tir, Park Geun-hye yimsüsütsü menden toktsütsü takhangba benoka longkak aittsü sentong nung S Korea nunger nisung meyirijang jenti shilem agiba noksa nung angur. (Seoul, November 05)

Seoul, November 05 (Agencies): South Korea nübur meyirijang jenti par yimtiba, Seoul nung sentepa, par Tir, Park Geun-hye-i lenisütsü menden toktsütsü takhangba benoka tanü, Honibar nü kanga sashia longkak aitogo.
Tan longkak aitba ya küm aika nung Seoul yimtiba nung S Korea nübur timtibai sentepa longkak aittsü sentong kanga sashia agir lir.
Tanü nikongtsü tashi nung nübur nisung 43,000 shi mombati tzükloker par longkak aittsü sentong agiba osang ka police-ia metetdaktsüogo.
“Tanü sentong nung S Korea nübur nisung 100,000 shi shilem agia liasü aser ibaji taoba mapang, 2008 nung agiba US nungi nashishi alizükba anema longkak aittsü sentong sülen tan mezüngsüa nisung timtibai longkak aittsü sentong nung shilem agir lir,” ta tayongertemia metetdaktsü.
Park-i lar tembar nem maongka balaka agüja, lar medemlai rongsen tajangzük anguba ken o nung ajemdaker, opposition aser nüburtemi la Tir menden nungi anentsüt takhangba benoka la anema kanga sashia longkak aittsü tenzüka lir.
Prosecutor-temi la anema benokba bushisüngdang mapatong nung parnok den amaliteptsü tenangzükba ka Park-ia metetdaktsüogo.
La anema kinünger mesüra medemer pusema, parnok nem tajangzük balaka agütsüba ken o benoktsü tenzükba sülen lar nüburtemi la dak temulung alemba aser la pusemtsü mulungbaren noklang nung shilem 5 agi tajemba akümba osang tan Hokolbar nü tashi nung bushitetogo.
Ano, tanü longkak aitertem azüoktsü atema police lenirtemi par police ketdangser nisung 17,600 aser police telok 220 tashi longkak aitdaki yokba osang  Police-isa metetdakja liasü.