S Korea nüburtemi Park Tir menden toktsütsü akhanger

South Korea Tir, Park Geun-hye yimsüsütsü menden nungi anentsü takhangba benoker nüburtemi ozülu bener Seoul yimtiba nung longkak aitba noksa nung angur. (Seoul, October 29)

Seoul, October 29 (Agencies): South Korea nübur meyirijang jenti par Tir, Park Geun-hye yimsüsütsü menden nungi anentsü takhangba benoka, Seoul yimtiba nung kanga sashia longkak aitogo.
Park-i ozüng alema inyaka, lar medemer, Choi Soon-sil nem rongsen aser tanga tajangzük balaka agütsüba ken o nung ajemdaker ozüng benshirtemi Park bushisüngdangtsü tenzükba mapang ka nung S Korea nüburtemi par Tir anema longkak aittsü sentongji tanü, Honibar nü ayonga agir lir.
Park-i ozüng alema inyakba ajanga nüburi la dak temulung melemteti küma, lai par S Korea linük lenitsü metemtsüi kümogo ta la aija, lar nüburtemi tanü longkak aita liasü.
“Park-i Tir menden toktsütsüla,” ta Park-i aniba sorkar kanga sashia anemer, Seoul anülulentip tsütsülen, Seongnam City Mayor, Lee Jae-myung-i metetdaktsü.
“Park-i Tir menden toktsüba ajanga onok taküm jenjang tajungba akümtsü,” ta tanü sentong nung shilem agir nisung 8000 shi ola tulu adoka shilem agi.
Park-i lar Tir menden abentsü kümsük küm 5 nung tang küm 4 buba Tir menden abener lir.
La anema benokba ken o nung ajemdaker bushisüngdang sentong kanga junga agitsü takhangba ka Opposition telokia benokogo saka parnoki la Tir menden nungi anentsütsü onükbo tanü tashi mebenoki lir.