S Korea nung mitkar ozüng benoktsü sentong mali: Park

Seoul, November 18 (Agencies): South Korea linük nung mitkar ozüng benoktsü sentong maliba olen ka S Korea Tir, Park Geun-hye-i tanü, Hokolbar nü jangjashitsüogo.
“Opposition teloki nüngmenük bener aruja, ozü yimtenren jenjang tamajungba kümdaktsütsü nükjidong nung ni S Korea nung mitkar ozüng benoktsü sentong miima renemer ta olulu prokshitsü tenzüka lir,” ta shia, par linük nung mitkar ozüng benoktsü bilemba maliba olenji Park-i metetdaktsü.
Park-i lar tembar ka nem maongka balaka agüja, senotsü tajangzük balaka ngudaktsüba ken o nung ajemdaker Park-i Tir menden toktsütsü takhangba benoka, opposition densema, S Korea nüburtemi Park aser lai aniba Seoul sorkar anema kanga sashia nokdaktsü tenzüka lir.
Park-i lar linük nung tashiyim agi mitkar ozüng benoktsü miim sentong yangluba osangji opposition telok nung densemba Democratic Party yimtenren telok lenisang, Choo Mi-ae-i par telok senden nung tanü sangoktsüba osang angazükogo.
“Choo-i tongti opposition telok lenir ka memesüki olulu prokshitsü tenzükogo aser pai olulu prokshiba ajanga pa khuret mabener lenir ka ta kuli angur,” ta Park’er otongdar, Jung Youn-kuk-ia metetdaktsü.
Park-i la nem agütsüba yimsüsütsü tashi ozüng alema benshiba ken o nung ajemdaker lai lasasa Tir menden toktsütsü mesüra la yimsüsütsü menden nungi tashiyim agi anendaktsütsü amokmerena, S Korea nüburtemi joko hopta 4 shi Park aser lai aniba sorkar kanga sashia anemtsü tenzüka lir.
Parnoki maneni tan Honibar nüa, Park-i Tir menden toktsütsü takhangba benoka, Seoul yimtiba nung longkak aita, yimdongsüa jajatsü sentong renemba osang angazükogo.
Park tebu, Park Chung-hee-i tashiyim agi linük yimsüsütsü tashi 1961 küm agiba sülen par S Korea nung tashiyim agi mitkar ozüng benoka, pa kaseta asüba küm, 1979 tashi yimsü asü.
Pai S Korea madak yimsüsü asüdang Chung-hee-i par linük nung mitkar ozüng anaben tashi benoka liasü.