S Korea nung Modi-i Gandhi kürakyanglu ka sayatsüogo

Seoul, February 21, 2019: Tanü South Korea yimtiba, Seoul nung aliba Yonsei University nung Mahatma Gandhi kürakyanglu ka sayatsüba sentong nung Ato kilonser, Narendra Modi aser South Korea Tir, Moon Jae-in na den tangartem külemi tangokba noksa nung angur. 

Seoul, February 21 (Agencies): Tanü South Korea nung aliba Yonsei University nung Ato kilonser, Narendra Modi-i Mahatma Gandhi indang kürakyanglu ka sayatsüogo.
South Korea yimtiba, Seoul nung jembidang Modi-i, “Aso 20buba nung Gandhi ya atangji meimchir atema sempet tulutiba liasü. Taoba Aso nung pa taküm aser libaliro ajanga pai tarutsü tia sayu. Atangji pai, ‘kü taküm ya osang ka lir’ ta ashi,” ta metetdaktsü.
“Iba sentong ya tetezü tulu keta lir, kechiyong asenoki Mahatma Gandhi sor küm 150 ajungba amonger aser alimai Gandhi indang tangatetbatemji meimchir tarutsü atema lir ta züngshir,” ta paisa ashi.
Tesülen Ato kilonser office nungi twitter ajanga, “Bapu (Gandhi) indang tangatetbatem nung tashi lir, koba ajanga asenoki kiralongra aser climate change kokteter – iba onük ana ya meimchir atema tayongzükba tulutiba lir,” ta metetdaktsü.
“Pa libaliro ajanga pai alima den yimjiyimjung nung alitsü sayu. Paisa tarutsü putu atema lipokümji kanga tongtibang ta sayu,” ta kasa osang ajanga metetdaktsü.
Modi-i jembiba sülen taoba mapang UN Secretary General, Ban Ki-moon-i jembia liasü.
Moon-i, Gandhi asoba anogomong- October 2 ya ‘International Day of Non-Violence’ lir aser Gandhi sor küm 150 ajungba sentong nung shilem agitetba ya pa atema maongka tulu, ta ashi.
Modi-i anogo ananü atema South Korea linük semdanga lir. Iba linük nung pai Seoul Peace Prize agizüktsü aser yimtenren ken o jembitsü. Paisa India-Korea business symposium nunga jembitsü.
Ato kilonser Modi-i Seoul yimti semdangba mapang nung linük ana tesendaktep onüktem reprangshitsü, ta taoba hopta Ministry of External Affairs-i sangdong ka ajanga metetdakja liasü.
Yaküm July ita nung S Korea Tir, Moon-i India semdangba aser November ita nung Korea Tir kinüngtsü, Kim Jung-sook-i Ayodhya nung Deepotsav sentong nung shilem agiba sülen India aser South Korea na tesendaktep tajungba akum, ta Ministry-isa metetdaktsü.