S Korea Tir, Park-i China dang pelaba metetdaktsür

South Korea Tir, Park Geun-hye-i tanü Bodbar nü Beijing tonga aoba sülen China Tir, Xi Jinping (Achijilen) den teka amtepa ajurutepba noksa nung angur. (Beijing, September 02)

Beijing, September 02 (Agencies): South Korea Tir, Park Geun-hye-i China dang pelaba olen ka tanü Bodbar nü metetdaktsüogo.

China-i Asia nung World War II tongpang tembangber küm 70 abensaba bilemteta amongtsü ayongba sentong nung shilem agitsü asoshi jaokba ama, Park-i tanü Beijing yimti tonga aoba sülen China Tir, Xi Jinping den ajururtepdang iba olenji lemsatepa liasü.

Tawa North Korea aser lar South Korea na tsüngda tongpanga raratsüsa tensa mejungi akümba azüoktsü maparen nung tongti shilem agiba atema Park-i tanü pelaba olenji metetdaktsü.

“Korean peninsula nung tensa kanga mejungi akümbaren azüoktsüsa tongti shilem agiba atema China dang pelaba metetdaktsür. Korean peninsula nung yimtenren tensa tangasa mejungi lir aser iba den sentakba onüka lemsateptsü renema lir,” ta Park-i ashi.

Park-i tanü nungi tenzüka China anogo 3 agia semdangtsü sentong aliba osanga jangjaogo.

Park-i tan China semdangba ajanga par linük ana tsüngda tesendaktep kanga junga akümba kulia angur.

Alima ajunga nung shishilembatsü osettsüset timba ayokba linük, China ya S Korea den shishilembaba tongti linük ka akümba osanga bushiteta lir.

“China aser Republic of Korea na tsüngda tesendaktep tajung aliba den külemi, asen linük anapronglai regional aser alima sabang nung yimji yimjung alitsü asoshi tongti shilem agir,” ta Xi-ia tanü metetdaktsü.

Ano külen, tawa par linük ana tsüngda meraratsü nangzüktepba den sentakba osang kümdanga lemsateptsü amokmerenba olen ka N Korea-ia tanü metetdaktsüogo.

China-i asüng, Brehostibar nü agitsü ayongba mitkar parade sentong nung Cenral Committee of North Korea’s Workers’ Party nung Secretary, Choe Ryong Hae-ia shilem agitsü sentong renema lir saka Choe-i Park den Bejing nung ajuruteptsü sentong renemba osangbo tang tashi mejangjateti lir.