S Korea Tir, Park o China Ato Kilonser, Li nati Seoul nung ajuruteper

South Korea mitkartemi Seoul yimtiba kübok presidential Blue House kimalen agiba China Ato Kilonser, Li Keqiang (Abelen) pela agizükba sentong nung South Korea Tir, Park Geun-hye (Achijilen)-i Li den külemi shilem agiba noksa ka yangi angur. (Seoul, October 31)

Seoul, October 31 (Agencies): South Korea Tir, Park Geun-hye aser China Ato Kilonser, Li Keqiang nati Seoul yimti kübok presidential Blue House nung tanü Honibar nü ajurutepa senden ka menogo.
Japan Ato Kilonser, Shinzo Abe den arok senden ka asüng, Deobar nü amenba jakdang, lenir anati tanü ajurutepa jurila sendenji amener lir.
Tanü senden nung Park o Li nati taküm küm tatem tashi nung tetsükdakba kecha melii shishilembatsü tezüngzüktep agitsü onük benokba osang jangjaogo.
Par linük anati robotics sabang nung amalitepa inyakteptsü nangzüktepba den külemi, S Korea nung renemba chiyongtsü balala China dang ayoktsü asoshi tanü senden nung nangzüktepa liasü.
Ano, tang China aser US na tsüngda adokba South China Sea den sentakba mangatettep ken o nung S Korea-i US pu masemtsü olen ka Li-i tanü benokba osanga jangjaogo.
North Korea linüki par tongpang nung amshitsü missile aser nuclear osettsüset amshia amaktsü mapang shia amokmerenba yong US sorkari N Korea den kidangsüa aliba linük, S Korea nung par mitkar züngsem 28,500 tashi tang yuja lir.
Ano külen, linük asem lenirtemi asüng amentsü ayongba senden ya 2012 küm amenba sülenbo tan mezüngsüa arok senden amentsü sentong renemer lir.
Japan mitkartemi tesüiba mapang, World War II (WWII) nung tashiyim inyakba atema Japan lenirtemi taidok memeshiba aser tzüyim den sentakba mangatettep ken o adokba yong par linük asemi arok sendenji bilemba ama mememtettsüsa aküm.
Park-i Japan lenisang, Abe dena taruba Hombar nü ajurutepa jurila senden ka amentsü sentong renema lir.