S Libya yimjung tezüngzüktep pela agizüker: UN

Geneva, November 25 (Agencies): Libya anülulentip tsütsü mangatettep adoka raraba tongti kin ana tsüngda agiba yimjung tenzüngzüktep pela agizükba olen ka United Nations (UN)-i tanü Bodbar nü metetdaktsüogo.

Libya linük nung yimtenren tebilemtsü bener arutsütsüsa mangatettep adokbaren tatem küma agientsü nükjidong nung tan yimjung tezüngzüktep agirtemi Libya sorkar den maneni angatetteptsü tajungshiba olen ka UN-isa metetdaktsüogo.

Qatar linüki ayonger külen Libya kübok Ubari jila nung Tuareg aser Tebu kin na tsüngda tan teti asoshi yimjung nung alitsü tenzüngzüktep agiba sülen pei talidak toktsür tanga tesem nung jenoka alirtemi pei talidaki tanaben shilangba osanga jangjaogo ta sorkari ketdang asüba QNA new agency-ia metetdaktsüogo.

Ano, tan tezüngzüktep agir kin anapronglai Libya nübur ajunga ka küma lungjemer par linük tanaben yanglushitsü tajungshiba olen ka metetdakja lir.

Alimai agizükba aser Tobruk nung tentetba Libya sorkar aser Tirpoli nung tentetba sorkar tanabuba na tsüngda tangatettep kati arua par linük nung yimji yimjung lidaktsütsü asoshi UN-i tanen makai inyakba osanga bushiteta lir.

“Tan yimjung tezüngzüktep agiba ajanga Libya ajunga nung mangatettepbaren ajunga agiena par linük nung yimji yimjung alitsü imlar,” ta UN Secretary General, Ban Ki-moon-ia metetdaktsüogo.