S Sudan nem teyari sen million 133 agütsütsü nangzüker: US

Kampala, September 23 (Agencies): US sorkari South Sudan nung nunger refugee nisungtem aser pei talidak melitettsüsa küma, tanga tesem nung jenoka alitsüsa akümer nüburtem yaritsü nükjidong nung teyari sen, dollar sen million 133 tashi S Sudan sorkar nem agütsütsü nangzükba osang ka US’er State Department-i tanü, Hokolbar nü metetdaktsüogo.
S Sudan nung nübur o nübur na tsüngda tongpang kanga sashia aruba sülen par linük tensa tajungba akümba mapang ka nung US-i par linük nem teyari agütsütsü maparen ajemtsüla ta o lemteptsü tenzük aka, US sorkari tan teyari agütsütsü tenangzükbaji agir lir.
“S Sudan lenirtemi par nüburtem asoshi bendanga agüja inyaktsü temulungtetba melira, ozü US-ia par linük nem teyari agütsüba mapatong anenadoktsü,” ta US Secretary of State, John Kerry-ia taoba August ita sangokja liasü.
2013 küm December ita nungi tenzüka, S Sudan nung tongpang kanga sashia raratsü tenzükba mapang nungi tanü tashi nung S Sudan nübur nisung million 1.6 shi pei talikdak melitettsüsa küma, S Sudan küboksa tanga tesemtem nung jenoka alitsüsa tia ajuruba osang bushitetogo.
Alima ajunga nung linük tanübotiba, S Sudan nung tongpang raratsü tenzüker tanü tashi nung United Nations-ia par linük nem teyari sen, dollar sen billion 1.9 shi agüja yariba osang jangjaogo.