S Sudan sorkar anemer lenisang, Machar-i VP menden benoker

Juba, April 27 (Agencies): South Sudan sorkar anemer lenisang, Riek Machar-i Juba yimtiba yashi, Mongolbar nü tonga aoba sülen S Sudan Tatong Tir inyaktsü tenangzükba agiogo.

Machar-i Juba yimti tanaben shilanga, Tatong Tir inyaktsü tenangzükba agiba ajanga taoba ita 30 tejaklen nungi tenzüka nübur o nübur na tsüngda tongpang rara tensa mejungi akümbaren tajungba kümdakja par S Sudan nung yimji yimjung alitsü asoshi sorkari teimla ayutsü tenzükogo.

“Machar künati aroki lungjemer Transitional Government of National Unity sorkar tekaratiba nung tentettsü nangzüker,” ta Machar-i yimsüsütsü menden abentsü tenangzükba agiba sülen S Sudan Tir, Salva Kiir-ia metetdaktsü.

S Sudan sorkar aser sorkar anemer nati tawa agiba yimjung tezüngzüktep nung telok anaprongi aroki lokteper sorkar tasen tentettsü ocet densema lir aser parnoki nangzüktepba ama, Kiir o Machar nati par sorkar tasenba tentettsü mapatong tenzükogo.

Machar-ia Tir Kiir den kechisarena ajunga nung amalitepa inyaktsü asoshi nangzüka liasü.

Machar-i taoba mapanga Tatong Tir ama, par S Sudan tenzük saka pa lenisütsü menden nungi 2013 küm July ita anentsüba sülen pai aniba sorkar anemer teloki Tir Kiir aser pa pusemertem den tongpang raratsü tenzük.

Iba mapang nungi tenzüka tanü tashi nung S Sudan nübur nisung meyirijang jenti asüba den külemi, nisung million 2 dak temai S Sudan toktsür kidangsüa aliba linüktem nung jenokba osang bushiteta lir.