S Sudan sorkar anemertemi yimjung tezüngzüktep agir

Addis Ababa, October 26 (Agencies): South Sudan sorkar den taküm August ita agiba yimjung tezüngzüktep den sentakba security mapatong mapa küma inyaktsü maparen tatembangleni arua, S Sudan sorkar anemertemi sorkar ketdangsertem den tezüngzüktep tasen ka tanü Hombar nü agishiogo.

Taküm August ita tezüngzüktep agiba sülena S Sudan nung tongpang maneni raraba osang bushiteta lir ajisüaka, tan tezüngzüktep agishiba ajanga par linük nung yimji yimjung tia asangsang nung bener arutsütsü ta nüburtemi teimla tulu yua lir.

Tanü agiba tezüngzüktepji taoba September ita agitsü asoshi sorkar lenirtemi benok saka Juba yimtiba nung sorkar mitkartem tali yuja aliba yong sorkar anemertemi iba tezüngzüktepji agitsü memelungi aliba osang jangjaogo.

Tan tezüngzüktep agibaji East Africa linüktemi külemi lungjemer tentetba IGAD tenteti ketdangsüa ita 22 tejaklen nungi tenzükba yimjung tezüngzüktep agitsü maparen takok ngua agitsü mera tongti ka agir lir ta S Sudan’er Foreign Affairs nung Deputy Minister, Peter Bashir-ia metetdaktsüogo.

“Sorkar anemertem den tan tezüngzüktep takok ngua agiba dak ajemdaker maneni tongti tezüngzüktep jenti agitsü anünga lir,” ta pai shisem.

2013 küm December ita nungi tenzüka S Sudan Tir, Salva Kirr aser par taoba Tatong Tir, Riek Machar na tsüngda mangatettep ken o adoka tongpang kanga sashia raratsü tenzükba ajanga S Sudan nübur million aikati timtem toushi jenti ajurutsü tenzüka lir.

“S Sudan nübur million 10 dak temai tang achitsü chiyongtsü monguteti aliba osang bushiteta lir,” ta United Nations-ia metetdaktsüogo.

2014 küm January ita nungi tenzüka Kirr aser Machar nati aniba telok ana tsüngda yimjung tezüngzüktep aiben agia lir saka S Sudan linüki tanü tashi yimji yimjung tensa monguteti lir.