S Sudan Tir, Kiir-i yimjung tezüngzüktep agitsü renemer

Juba, August 25 (Agencies): South Sudan nung taoba ita 20 tejaklen nungi tenzüka par nübur o nübur na tsüngda tongpang raratepa tensa mejungi kümdaktsüba agientsü nükjidong nung yimjung tezüngzüktep ka agitsü asoshi S Sudan Tir, Slava Kiir-i terenemshiba agiba osang jangjaogo.

“Taoba S Sudan Tatong Tir, Riek Machar-i aniba sorkar anemertem den yimjung tezüngzüktep ka asüng, Bodbar nü Juba yimtiba nung agitsü asoshi Tir Kiir-i terenemshiba agia lir,” ta East Africa nung tentetba IGAD teloki tanü Mongolbar nü metetdaktsü.

Kiir-i aniba sorkar aser Machar-i aniba sorkar anemer telok na tsüngda mangatettep adoka tongpang rarabaren anena yimjung nung alitsü tezüngzüktep agitsü asoshi IGAD-i telok anaprongla ajungshia aruba osanga jangjaogo.

Machar-i tan August ita 17 nütu yimjung tenzükzüktep ka Addis Ababa nung agia liasü saka iba tezüngzüktep kübok yimji yimjung mekatettsü ta shia, Kiir-i iba tezüngzüktepji magizük.

Ano külen, S South nung mangatettep adoka aliba telok anapronglai par raratepbaren manenra, par telok anaprongla anema tenokdangba sentongtem benoktsü amokmerenba olen ka United States-ia metetdakja lir.

S Sudan nung mangatetep adoka tongpang kanga sashia raratsü tenzükba sülen tanü tashi nung S Sudan nübur million 2.2 shi pei talidak toktsür tanga tesem nung jenoktsüsa tai tang ajurua lir.

“Ozü lenir, Kiir-i yimjung tezüngzüktep zülutepa agitsü renema lir saka yimjung tezüngzüktepji agiaka, iba jagi ozü S Sudan nung yimji yimjung tia bener marutsütettsü ta pai aniba sorkar tangatetba lir,” ta Kiir’er otongar, Ateny Wek Ateny-ia metetdaktsüogo.

Kiir aser Machar nati yimjung tezüngzüktep zülutepa agiba sentong nung Kenya, Uganda, Ethiopia aser Sudan lenirtemia shilem agitsü renema lir.