SAARC linüktemi kiralongra atema o lemteptsüla: Ranil

New Delhi, October 05, 2016: Bodhbarnü New Delhi nung Congress Tir, Sonia Gandhi-i Sri Lanka Ato kilonser, Ranil Wickremesinghe den senden amenba noksa nung angur. Kasa noksa nung taoba mapang UPA sorkar Ato kilonser, Manmohan Singh aser senior Congress lenir, Anand Sharma nata angur.

New Delhi, October 05 (Agencies): Arrtsü adena kiralongraba ya tebilemtsü onük tuluka lir aser SAARC linüktemi iba tebilemtsü koktettsü atema o lemteptsü nüngdak, ta Bodhbarnü Sri Lanka Ato kilonser, Ranil Wickramasinghe-i ashi.
Kiralongrartemi Uri amakba sülen India-i mangyangba pusema Wickramasinghe-i,  “Iba tensa süngjemtsü atema ner Ato kilonseri (Narendra Modi) mera aika agiogo,” ta ashi.
China linük den par linük tesentaktep dak setntakba nung Sri Lanka leniri, “China den ozü linük tesentaktepji sepai masü saka rongsenkettsüng tesentaktep lir,” ta ashi.
Tamalen Nepal-ia SAARC linüktem dang arrtsü adena kiralongratsü atema kiralongrartem nem pei litsü mamshidaktsütsüla, ta shiogo.
19buba SAARC senden taküm November ita Pakistan yimtiba, Islamabad nung amentsü ayonga liasü, ajisüaka India-i anir tanga linüktemi iba senden nung madentsü lemtetba ajanga iba senden thinenogo.
SAARC senden thinenba sangdong agütsüdang Nepal-i, “Tesem nung yimjung alitsü atema SAARC züngsem linüktemi peipei litsüji kiralongrartem nem kiralongratsü atema mamshidaktsütsüla,” ta metetdakja liasü.