Sachin Pilot-i Centre dang tasüngdangba 3 asüngdang

New Delhi, August 29 (Agencies): Tang Congress Party-i Bihar nung ‘Voter Adhikar Yatra’ agiba mapang nung Hokolbarnü Congress General Secretary, Sachin Pilot-i Centre sorkar dang tasüngdangba asem asüngdangogo.

West Champaran nung Pilot-i, Election Commission dak melung malemtsüsa lir, aser vote auyaba ya nüburtemi magizüktettsüla, ta ashi.

Pilot-i X ajanga, Rahul Gandhi aser RJD lenir Tejashwi Yadav nati agiba Yatra ya nüburtem nem tanaben democracy nung temelung lemtetdaktsütsü atema lir, ta ashi.

“Rahul Gandhi-i kuli agüja tasüngdangba aika asüngdangogo saka Election Commission-i telangzüba magütsür,” ta Pilot-i metetdaktsü.

Pilot-i Centre sorkar dang, “Chief Election Commissioner shimba maparen nung kechiba Chief Justice of India (CJI) agien aser kechiba Home Minister züngok?” ta asüngdang. Paisa, “CCTV noksatem indoktsü atema shibai mela?” ta asüngdang.

Maneni pai, “Supreme Court-i Congress nem voter list agüjang ta tuyu, kechiba kasa anogo nungji temzüng melenshi? Parnoki voter list agütsütsü makok asü? Shibai ibaji tuyu?” ta asüngdang.

Taküm küm tetenzüklen Rahul Gandhi aser Prashant Kishor na densema yimtenren lenir aikati Chief Election Commissioner tasen shimba inyakyim ashishia liasü. February ita nung Centre-i Gyanesh Kumar CEC asütsü ta sangdonga liasü.

CEC shimba selection panel nungji Ato kilonser Narendra Modi, Union home minister Amit Shah, Union law minister Arjun Ram Meghwal aser Opposition lenir Rahul Gandhi nunger liasü. Iba panel nung Chief Justice of India (CJI) agienbaji Rahul Gandhi-i shishia liasü.

Ano külen taküm June ita nung Election Commission-i state nung election ketdangsertem dang election mapang amshiba CCTV footage ji anogo 45 sülenbo indokang ta tuyua liasü.

Sachin Pilot-isa Bihar yimtiba, Patna nung BJP nung inyakertem aser Congress nung inyakertem tsüngda raraba aija liasü.

“Tanü Bihar Pradesh Congress Committee headquarters nung rara adok. Tang opposition amokmerenba yimya ya kodanga magizüktettsü. Patna nung tatalokbaji onoki sashia aitsür,” ta Pilot-i metetdaktsü.