Sachin Tendulkar-i Anil Kumble nem tenüngsang agütsür

London, July 12 (Agencies) : Indian cricket team atema tawa tasen shimba coach Anil Kumble ji asayar tajung ka lir aser pai asayartem dang takok tulu angutsü atema tesayubatem agütsütsü ta Sachin Tendulkar-i ashi.
Indian cricket team coach shimtsü atema Cricket Advisory Committee (CAC) nung Tendulkar den taoba captain Sourav Ganguly dena liasü.
“Anil ya asayar tajung ka lir. Pai kanga meranger. Pai asaya shia takok angutsü atema merangtsü. Anil-i küm 20 jungnüa cricket asayaogo, anungji pai aika lemsateptsü” ta Tendulkar-i ashi.
“Saisapong nung mapang tajung aser tamajungtem ajurur aser itemji ajangtettsü kanga tongtipang. Asenoki sentong aika atonger saka itemji mapa küma inyakteter asü masü ta asübaji tongtipang. Saisapong nung anogoshia takok mangur aser khenkhenbo tamakoktem ajurutsüsa” ta paisa shisem.
Osangbenertemi Tendulkar dang taoba Indian team director Ravi Shastri-i coach manguba atema mepelai jembiba atema olen ka asüngdangdang, “senden amenba taktang nung kechi jembiogo, ibaji yimjak nung memetetdaktsütsü” ta pai langzü.
“Ravi-i shilem tajung agiogo aser pai mapa kanga junga inyakogo. Pa den külemi cricket asayaogo aser pai cricket kanga meimba ni angateta lir” ta Tendulkar-isa shisem.