Sadhu minister tem

Sangtennü (Mongulbar) Madhya Pradesh chief minister Shivraj Singh Chouhan-i Hindu nunger sadhu pungu nem Minister of state jenjang agütsüba atema opposition Congress-i anir nisung aikati ashishiteper. Hindu nunger sadhu temji Computer Baba ta ajasang Namdeo Das Tyagi, Yogendra Mahant, Bhaiyyuji Maharaj, Narmadanand Maharaja ser Hariharanand Maharaj nungertem lir. Taoba mapang Chouhan-i “Nisung kari vote angutsü atema yimtenren mapa inyaker, iba ama mapa ya meinyaktsüla” ta jembia liasü saka tangbo pai kasa mapaji inyakba atema nisung aikati pa aitsür. Chouhan-i Narmada Sewa Yatra sentong atonga agiba aser Narmada ayongküm nung süngdong atemba atema item Hindu nunger sadhutemi pa anema noktak saka parnok nem minister jenjang agütsüli parnoki Chouhan anema noktakba meyipa agir ta metetdaktsüogo. “Tang nungibo Madhya Pradesh sorkar anema menokdaktsü aser sorkar den tzü mopung kümzüka ayuba mapa nung yariteptsü” ta Computer Baba-i ashi. Taoba mapang iba kasa sadhu yagi Congress lennir Digvijaya Singh den-a külemi Narmada parikrama sentong nung shilem agia liasü. Iba inyakyim ajanga MP chief minister Chouhan-i yimten aser tamangba yimsü na meyoktepdaktsüogo aser iba ya tebilemtsü tulu ka lir, kechiyong asüng-yanü lokti atema inyaker tanga tamangba yimsü lennirtemia kasa jenjang meshitsü meteta mali aser ano candidate temi kanga dang meranga election nung toktepba sülen ang Minister menden anguba mapa amajok kümdaktsür. Madhya Pradesh nung ita tenet dang lir külen assembly election agitsü lir aser idakji rangloker tang Chouhan-i iba mapa inyaker asütsü. Hindu nunger sanghu punguji sorkar ketdangsübaren mesüra tzü mopung kümzüka ayubaren nung inyakdangba mesüra ajangshia aruba nisungtem masü. Ajisüaka parnok sülen anidaker nütsüng aika lir aser iba jagi BJP-i taruba election nung item vote ji angutsü atema parnok nem minister menden agütsü südi. Chouhan’er sorkari ochimashi aser tim masüba mapa inyaker ta item sadhu temi aija aru saka parnok minister jenjang nung shimba sülen ibaji meyipa agiba ajanga item ama tamangba yimsü lennirtem dak temulung alemtsübaji tarendaktsü ka kümogo aser parnoki jembiba o tem dak mamangtettsü mapang ka ajuruogo. Congress tir Rahul Gandhi-i Madhya Pradesh Chief Minister Chouhan aser ‘baba’ telok lutsüogo. “BJP-i parnok ochimashi mapa mimbanga ayutsü atema teti tasa tajung apiteta inyakba atema tenüngsang agütsür. Madhya Pradesh nung item tamangba yimsü lennirtemi sorkari ochimashi mapa inyaker ta anema noktak saka parnok nem Minister of State  jenjang agütsüba sülen ola mali kümogo” ta Rahul-i aitsü. Ano külen, Aam Aadmi Party (AAP)-ia Chief Minister Chouhan ji lapi ka lir aser anemsü baba temi pa amokmerenba mekoki parnok nem minister menden agütsü ta aitsüogo. Anosa, Yangtepnü (Brihostibar) India nung Hindu nunger Sants (saints) aser Sadhu nunger telok 14 lokteper tentetba Akhil Bharatiya Akhada Parishad (ABAP)-i Madhya Pradesh nung sadhu pungu aitsüogo aser parnoki Chouhan amokmeren ta tai tongloktsüogo. Par pungu ya tamangba yimsü dak sendakba telok kar nung dang sendaktepa aliba bushitetra ozüng tapet agi merenshitsü ta ABAP tir Mahant Narendra Giri-i metetdaktsüogo. 2014 küm BJP-i Centre nung sorkar akümtsü tashi anguba sülen nungi meilong meilongi India kübok state balala nung BJP sorkar temi Hindu tamangba yimsü nung ajemdaker ozüng tesashi yanglua aruba ajanga tanga tamangba yimsü amangertemi timtem-tuoshi jenti ajurua arur. Talisa tang Madhya Pradesh nung BJP sorkari sadhu tem indangindanga dang Minister shimba inyakyim ka tenzükbaji tanga state sorkari temia ajizüka inyak nungbo Linük Temzüng nungi secular ta asüba olungji agientsüsa tensa ka ajurutsü. Anungji, memenudang MP nung inyakba mapa anema Congress aser AAP-i dang masü saka tanga political party tem aser ABAP-i dang masü tanga tamangba yimsü lennirtemi ola adoktsüla aser chief minister Chouhan nem iba telemtetba ya meyipa agidaktsütsüla.