Sadhu tem MoS shimba atema HC-i MP sorkar nem notice ka agütsü

Bhopal, Rongchii (April) 9 (Agencies): Madhya Pradesh sorkari tamangba yimsü lennir pungu nem Minister of State (MoS) jenjang agütsüba atema Madhya Pradesh High Court-i state sorkar nem osang ka sangoktsüogo.
High Court-i Shivraj Singh Chouhan’er sorkar dang hopta asem tsüngda osang atema telangzüba ka agütsütsü metetdaktsü.
Madhya Pradesh nung Bharatiya Janata Party (BJP) sorkari Hindu tamangba lennir pungu nem Minister of State jenjang agütsüba sülen anogo ishika lir High Court-i iba osang sangoktsüogo.
General Administration Department nung additional secretary KK Katiya-i tetuyuba agütsüba ka nung, Narmadanand Maharaj, Hariharanand Maharaj, Computer Baba, Bhayyu Maharaj aser Pandit Yogendra Mahant nunger nem MoS jenjang agütsür ta shia lir.
Madhya Pradesh nung taküm Assembly election agitsü lir aser opposition tongti Congress-i BJP dak tai tonglokja ashiba agi parnoki tamangba lennirtem sülen anidakertem atsür arutsü atema iba mapa inyak.
“Yimtenren tsütsü tajangzük angutsü atema iba mapa inyak. Ano, Chief minister Shivraj Singh Chouhan-i ochimashi inyakba nembangtsü atema iba mapa ya inyak. Pai Narmada wazüka ayutsü atema temulung magütsü. CM-i ayongküm nung süngdong crore 6 temogo ta ashiba kuli metettsü atema item tamanger nisungtemi tesem tonga oa reprangdangtsüla” ta Congress otongdar Pankaj Chaturvedi-i ashi.
Ajisüaka, State BJP otongdar Rajnish Agrawal-i ashiba agi opposition party-i tamangba lennirtem den tesentaktep ayuba ashishir aser maginür.
“Tzü-mopung aser ayong wazüka ayutsü atema mapa zübazüba inyaktsü atema tamanger lennirtem nem MoS jenjang agütsü. Narmada wazüka ayuba mapa inyaktsü atema parnok shimok aser iba mapa nung public-ia shilem agitsü atema lennirtem nem MoS jenjang agütsü” ta Agrawal-ia ashi. Talisa, BJP lennir karibo Shivraj Singh Chouhan lutsüogo. “Iba ya alima nung tesüngmangtsü 8 buba ama lir. Item tamangba lennirtemi party membership memeshi mesüra election kecha nung metoktep saka Minister of state jenjang angu” ta BJP lennir tejen Babulal Gaur-i osangbener dang ashi.
“Iba telemtetba atema tanga tamangba lennirtem mepelai alitsü akok kechiyong parnokia tashi aser security aginür” ta Gaur-isa shisem.